E ta ane le sefulu ma le tasi i le taeao o le Aso Toonai, aso 28 o Me, ua tumutumu le mamalu lasilasi, o le atunuu i le hall i Lethbridge Park, i le faailogaina o le tausaga o le ofisa malaga o Koleti Tauga.
E lē gata i le au valaaulia, lea na aofia ai foi ma le afioga i le pule o le Air Pacific Peseta John Nickel, o paaga masani o loo faaaogāina lenei ofisa mo a latou faigamalaga, ae faapea foi aiga ma uo na lagolagosua i le faamoemoe.
Na amata le sauniga i se saunoaga faafetai a le tamaitai pule, ona sosoo lea ma le sauniga lotu, na faatautaia e Pastor Fata Aperila.
O le afioga i le fofoga o le aso, o Taupa‘u Moananu. Faapea foi ona saunia e le faletua ma lona auaiga se taumafataga tele mo le faailogaina o lenei aso faapitoa, ua tino mai ai ana taumafaiga.
Na faia se se‘i, ta‘i $10.00 i le pepa, o le manumalo e malaga fua i Samoa, ma le $1,000.
O le faigamalaga agai i Samoa, na faameaalofa mai e le Air Pacific, lea na sola ma le taulealea o Fitu Tuiavii, mai Campbelltown.
Tulaga lua, o le malaga agai i Niu Sila ma le $500, na maua e Taeao Tu‘afuti mai Melbourne. Tulaga tolu o le $1,000, na faamanuia ai le tamā matua ia Namulauulu Poge.
E luasefulu faailoga na saunia e le faletua ia Koleti, e faafetaia ai le mamalu lasilasi, ona o le lagolagoina o ana taumafaiga. O Koleti Tauga, e tutoatasi lana auaunaga, ma ua ofi atu o ia i le asosi ua ta‘ua o Travel Counsellors.
O lona uiga, e te lē toe popole i nisi gaosa, poo le eseese o tali mo ou manaoga, ona na o ia lava e faia faaiuga mo au faigamalaga uma.
Ua valu tausaga, o avea ma Travel Consultant, ua iloga foi ma afu le tautua matavela i o tatou tagatāanuu i Ausetalia.
O le faletua ia Koleti ua faaipoipo atu i le alii o Aliimau Anitelea, ma e toalima o la alo.
O le Koleti Tauga Travel Counsellors, o loo fiafia tele e fesoasoani atu i le mamalu o le atunuu, e lē na o i latou o loo papaaao i Sydney, ae pei ona faamaoti mai e le faletua, e tele foi i latou o loo lagolagosua mai Griffith, Melbourne ma Brisbane.
O lenei auaunaga o loo i le tuatusi, 38 Cumbernaud Cres, Dharruk Mt Druitt poo le faafesootai le telefoni 02 9864 4560. Faafetai le saili malo Koleti, ma le faaea aiga!
