Le sao o le Aoga Amata, Leataata o Tupulaga, mo le Vaiaso o le Gagana Samoa
E mālie eseese lava, ma e lē lautasi le matagofie ma le felanulanuai o aga ma tu faa-Samoa sa faatinoina e le tele o aoga i totonu o Aukilani i le vaiaso mo le faatāuaina o le gagana Samoa i Niu Sila. Na molimauina le pisi ma le vevesi o aoga amata, aoga tulagalua, o kolisi e oo lava i iunivesite, ona o le tele o gaioiga ma tapenaga mo le faamanatuina o le vaiaso o le gagana Samoa.
O le aoga amata a Leataata o Tupulaga i West Habour i le itu i Sisifo o Aukilani, sa vaaia le tumutumu i ai o le toatele, aemaise o aoga sa valaaulia faapitoa e molimauina ma silasila i le sauniga faapitoa sa taulai i ai le autū mo le vaiaso o le gagana Samoa.
Na filifilia e le afioga i le tamaitai pule ia Leata Tipi, faapea le pulega ma le vasega i mātua o lea aoga amata, se tasi o sauniga sili ona tāua i le aganuu a Samoa, e fai ma o latou sao e momoli mo le faatāuaina o le gagana Samoa.
O le Ava o le Feiloaiga sa faatinoina e le fanau, ma o se lauga aogā tele, ma se feau tāua sa momoli e le fanau e ala i le faatinoina o lea foi aganuu a le atunuu.
E ui ina laiti tausaga o le fanau i lalo ifo o le lima tausaga, peitai sa mafai ona tautatala i ni upu maotua o le gagana, poo le gagana faamatai, e masani ai ituaiga aso faapea.
Na amata lava i le sufi ava, folafola ava, laga faatau ma le faatinoina o le faatau ma le sivaloa a failauga, seia oo lava i le tufaina o le ava, o le taupou palu ava ma le taulealea tautu ava, atoa ai ma le faamatafiina o paia ma mamalu o le aso, sa maoae ma matagofie le faatinoina e le fanau laiti.
O aoga a Lincoln High, West Harbour, faapea Colwill School, sa valaaulia e molimauina le aso o le fanau i le Leataata o Tupulaga. O tamaiti aoga mai West Harbour ma Lincoln High sa avea ma malo usu, a o le fanau mai Colwill sa feagai ma le paluina o le ava, agaia le ava, tufa le ava, toe tautu le ava. O le failauga e i lalo ifo o le lima tausaga mai le aoga amata a Leataata lava, sa fetalai mo le lauga autū o le aso.
A o le failauga a West Habour e fitu tausaga sa tali fuaitau ma fai ma fofoga o malo usu. Sa maualuga foi lea aso ona sa auai pulesili o aoga e tolu sa valaaulia. O le tasi foi lea vaaiga matagofie tele, ona sa laei e le alii pule o le aoga a Colwill, Mr Taylor le ie faitaga ma ona seevae tosotoso, o se tulaga e faailoa ai le taliaina aloaia, ma le auai i le faamamaluina o le aso faapitoa mo tagata Samoa.
O nisi o faiaoga palagi sa latou laeiina foi nisi o laei Samoa, o le faailoaina lava o le amanaia ma le lagolagoina o le vaiaso faamanatu.
O le mae‘a ai o le faatinoina o le Ava o le Feiloaiga, ona sosoo ai lea ma faafiafiaga o siva ma pese, ae taualuga i le haka a le Manu Samoa, sa faatinoina lava e alo ma fanau iti o le aoga amata.
O le faletua ia Leata Tipi o le faatonusili lava o le aoga, sa fai ma fofoga o le aso, ma sa fesoasoani foi mo le faamalamalamaina o gaioiga uma sa faatino e le fanau, mo alii ma tamaitai papalagi ma isi atunuu sa auai ai.
O le susuga i le Faafeagaiga o le ekalesia Faapotopotoga a le Atua (AOG) i Te Atatu, Pastor Ilala sa taitai i le sauniga mo le amataina o le polokalame a le fanau.
O le taumafataga mamafa ma faaaloaloga sa tauaao i ai le tamaitai pule o le aoga, faapea le mafutaga a mātua sa saunia mo le mamalu i malo faaaloalogia, ma le auvalaaulia ina ua mae‘a tapenaga a le fanau, ona taape ai lea ma le fiafia.
