O le tulai mai o le Fono Aoao a Aukilani e pei ona faato‘ā faavaeina i le tausaga talu ai, ua latou tuufaatasia ai se sauniga faapitoa mo le faamanatuina o le 49 tausaga talu ona tutoatasi le malo o Samoa mai pulega faakolone, mo lenei tausaga 2011.
O le afiafi o le Aso Sa, aso 5 o Iuni, na faataunuuina ai le suniga lotu tuufaatasi i Malaeola i Magele e pei ona sa amata mai, a o avea le Fono Faufautua a Aukilani ma fofoga o lea foi aso faapitoa mo Aukilani lava ia.
O le afioga i le Sui Taitaifono o le Fono a Aukilani le Samoa Auckland Council le susuga i le faafeagaiga Rev Asora Amosa, o le ekalesia PIC Avondale, sa fai ma fofoga o le sauniga, faatasi ai ma le faitauina o le Tusi Paia.
O le susuga i le Faifeau toeaina, Rev Tanielu T Mamea, o le ekalesia EFKS i Otara sa taitai i le sauniga, ma o ia foi sa laugaina le Afioga Paia a le Atua.
O nisi o auauna sa galulue foi i lea lava afiafi mo le tauaveina o le sauniga, o le susuga i le Sui Taitai o le Ekalesia Faapotopotoga a le Atua, o le faafeagaiga foi a le ekalesia AOG i Magele, le susuga ia Pastor Motu Matia, sa saunoa ma fofogaina le Tatalo. Sa auai foi le afioga i le Sea o le Sinoti a Niu Sila i Matu le susuga ia —-.
O aufaipese sa galulue mo le viiga o le Atua, O le aufaipese a le EFKS i Otara, le susuga i le Toeaina Tanielu Mamea. O le ekalesia Metotisi mai Henderson, faapea ai ma le aufaipese a le AOG i Magele, le susuga i le toeaina Motu Matia.
Sa auai foi i lea afiafi le afioga i le alii faipule o le itumalo o Magele, le tofa ia Su‘a William Sio.
O sui foi o le komiti, le afioga i le Peresitene o le Fono a Aukilani, Faatili Ugavau, o le afioga Fepuleai Semi, le susuga Papaliitele Mema Aspinal, ma nisi sa auai uma i le afiafi.
O le Aso Gafua aso 6 e sosoo ai, o loo fuafuaina ai le tele o faafiafiaga o le a faagasolo ai. O le nofoaga lava i Malaeola ua fuafua e faataunuuina ai fuafuaga uma.
O le aufaafiafia mai Samoa a le afioaga o Fasitoo-uta, o le komiti a le afioaga, o loo iai i Aukilani mo se malaga saili tupe, ua faapea foi ona faaaloalo i ai le komiti, ma valaaulia faapitoa e faafiafia ai.
I se feiloaiga ma se tasi o sui o le komiti, le afioga ia Fepuleai Semi, o ia foi o se tasi o sui o le Palemene o Samoa i tausaga ua mavae, sa ia ta‘ua ai e faapea, o mea masani lava e pei ona sau a‘i i le tele o tausaga ua alu.
O le taimi faatulagaina mo le sisiina o le Tagavai ma faafiafiaga e lē o solomuli ai le komiti ae o loo tapenaina pea mo le aso faamanatuina o le atunuu.
Saunoa foi Fepuleai ma toe faamanatu i le mamalu o Samoa i Aukilani ma Niu Sila atoa, le tāua tele o lea aso e lē tatau ona faagaloina e soo se Samoa lava.
