O le faamatalaga sili lava lea e fetaui lelei ma le faamanatuina o le Tutoatasi o Samoa i lona 49 lenei o tausaga. E pei ua na ona se‘i faamanatu lava leaga e tatau ona faatino, ae se‘i alo lelei lava Samoa i le atoaga o le 50 o tausaga o lona tutoatasi i le tausaga fou. Ae e ui i lea o loo lagona pea le tāua o le aso aemaise o le faamanatu ai o lenei laasaga tāua i le ola tuputupu a‘e o si o tatou atunuu.
TUUGA FAUTASI
O le tuuga faatasi na amata ai fiafia o le Fu‘a lea na faia i le aso 31 o Me. O le ono i le taeao e pei ona masani ai ae pā ma le fana ua amata mai Faagatama i le Tai mai i Fogaa i Faleula.
O le tausaga lenei ua na o le lima lava fautasi na mafai ona faaulu mai mo le tausinioga o le Gataifale.
E lē mailoa pe aisea ua lē auai ai isi faatasi ae o sa e lua o Aiga i le Tai, Fetu o le Moana (1) le siamupini o le tolu tausaga sosoo ua mae‘a nei o le Tutoatasi, atoa ai le isi sā o Faleu Manono, o le Fetu o le Moana (2) sa mautinoa lava le toe agai mai mo le puipuiga o lo latou manumalo ma le malosiaga i le gataifale mo le Tutoatasi o lenei tausaga.
O le sa lona tolu o le sa lea o le Afioaga o Lepea, le La o Samoa lea foi ua tusa ma le ono i le fitu tausaga o tausinio i Faagatama o le Tai. O le sa lona fā o le sa lea o le afioaga o Magiagi lea e faaigoaina o le Lupe o le So‘aga ma ua lua ai nei tausaga o alo alii o le afioaga i le sa lenei mo tuuga faatasi a le atunuu, ma le sa lona lima o le sa fou lea ua ta‘ua o le Tolotolo o le Tama Uli, o le sa o le afioaga o Salelologa na aloina e alo o le afioaga mai i le pitonuu o Sakalafai.
O le alii o Pauli Ivan Williams lea na kapeteni i le sa o Magiagi i le tausaga na tea nei ua agai i lona afioaga i Salelologa e taumafai mai le latou sa fou.
E amata le tuuga faapea a filivaa le sa o Salafai ma le sa o Faleu Manono le Fetu o le Moana Muamua ma le sa o le Lupe o le So‘aga, peitai na vave lava ona toe tala le va i autafa ma o inā na see ese ai loa sa e lua o le siamupini o le tutoatasi i faagatama o le tai, atoa ai ma le sa o Salelologa le Tolotolo o le Tama Uli.
E lei iai lava ni sikaili fou o le aloina o le vaa ma e foliga mai o le apefoe lava e tasi na alo mai ai le sa lenei o Salafai mai i le amataga o le tuuga seia oo lava ina faatini.
Sa i luma pe tusa ma le 15 minute le sa o Faleu Manono lea na faatautaia e le Afioga Leiataua Naseri ae o le mae‘a o le umi lea pe ua oo mai i Vaitele ae amata loa ona see ane i luma le sa o Salelologa ma alu atu ai loa e tutuu faatasi ma le Fetu o le Moana Muamua, ma e taunuu mai i tua ane o se mea o Mulinuu ae tala loa ma le va o le sa fou lenei ma agai atu ai lava i le tini mai i le mamao lea.
Na fai lava si mamao o le va o le sa muamua lea o Salelologa ma le sa o Faleu Manono, ma o le tapuaiga a le afioaga aemaise o isi uma tagata na tapuaia le faagatama o le tai i lea aso na lauloga uma Apia ma lona taulaga, faasolo ane ai i Mulinuu i le alaga o le fiafia ma le faafetai o le motu o Puleono, o lea ua tulai mai se sa mai i le motu tele ua mafai ona taofi le faaauau ai o le malosi o sa mai i Aiga i le Tai i lenei tausaga.
O le fiafia uma lea a le motu tele na vaaia i loimata maligi, o sauniga lotu faatatope na faia ina ua mae‘a mai lea faamoemoe aemaise o fiafia na sosoo mai ai.
E oo lava i sa na mulimuli mai na fiafia faatasi ai lava, ma e ese foi lea tausinioga i lenei tausaga, e ui i le laiti o i latou na filifilia se siamupini o le Tutoatasi o Samoa e ala i sa na auai, ae o se tuuga faatasi o le a manatua pea ona o lea na mafai ai e se vaa fou faato‘ā ofi mai i tauvaga ona sola ma le ipu o le $25,000 tala o le tupe na maua aemaise o le tapuaiga a le atunuu e foliga ua agai uma i ai i le sa o Salelologa i lea taeao e pei ona faamaonia i tauvalaau, o le sisiva faatasi ma le talie faatasi ma le auvaa a Sakalafai Salelologa.
O le tulaga lua o tuuga i lenei tausaga na maua e le Fetu o le Moanoa Muamua lea na faapea mai le Afioga Leiataua Naseri, “… e lē mua uma ni vaa, ae o lea e manino lava ua lava sauni le au mai i le motu tele ae e lei lava le sauniuniga a Aiga i le Tai”.
Faaalia e Leiataua o le a toe taumafai mai i tausinioga o le Teuila o lenei lava tausaga ia Setema ma o le a taumafai loa e faamalosi i le auvaa ma ia taumafai e malosi se tausinioga o lea taimi o le tausaga.
O le tulaga tolu na sola ma le sa o le afioaga o Lepea, le La o Samoa ma na ia maua le tinoitupe e $19,000. Tulaga fā ai le sa o Magiagi na ia maua le tinoitupe e $16,000 ma le tulaga lima na ave lea e le sa lona lua o Faleu Manono, lea na manumalo i le tinoitupe e $13,000.
E mautinoa le tele o sa i le fu‘a o le tausaga fou auā o lea e faaataata mai e ono oo atu i le $150,000 le seleni o le a faaalu i Tuuga Fautasi lava ia mo le tausaga fou.
FAAFIAFIAGA O LE FU‘A
E lei tele se faafiafiaga o le Tutoatasi o lenei tausaga ma e puupuu lava faafiafiaga o le aoauli ina ua mae‘a le sauniga tele o le tutoatasi i le taeao o le faigalotu, o le saunoaga a le Afioga Mamalu i le Ao o le Malo, le Afioga i le Tui Atua Tupua Tamasese Efi aemaise o le savali faaaloalo na faapea ona molimauina le faatumulia ai o le Malae i Tiafau i aoga, Faalapotopotoga a lotu, Faalapotopotoga Tumaoti aemaise ofisa eseese a le malo ma au taaalo, na maua le avanoa e faaali ai le faaaloalo i le atoaga o le 49 o tausaga o le Tutoatasi o Samoa.
O le Afioga i le Kovana o Amerika Samoa, le Afioga Togiola Tulafono atoa ai lona Faletua ma le sui o Amerika Samoa i le Konekeresi i Amerika, le Afioga Faleomavaega Eni Hunkin, faatasi ai sui o Malo mai i Fafo o loo faamautu i Niu Sila ma Samoa nei, na auai uma e molimauina le sisiina o le tagavai o Samoa i Tiafau.
Mae‘a le sauniga lea o se taumafataga puupuu na vasa‘i ai le polokalame ma faaauau ai loa faafiafiaga e pei ona ave i le Faalapotopotoga o Aoga Amata a Samoa lea na taitai ane e le Faletua ia Kuinimeli Eti Tamati, le Faletua o le Faifeau Toeaina i Faleasiu, o le Peresitene foi lea o lea Faalapotopotoga o Aoga Amata a Samoa.
O le pese Samoa atoa ai ma se ata puupuu i sauāga ua vaaia pea faasaga i fanau na ave i ai le feau tāua na momoli mai e lea ausiva. Sosoo ai loa ma le mauluulu ma le sāsā na saunia e le ausiva a tama aoga o le Matata Eseese a le Ekalesia Katoliko a le Don Bosco.
O faafiafiaga suifefiloi na faatautaia e nisi na malaga mai i fafo na sosoo ai ma tolaulau ai loa faailoga o le Tutoatasi o lenei tausaga ma faaaloaloga masani.
O le tele foi o vaega o le atunuu ua matauina ai le faia lava o a latou faamanatuga ma ua avea foi le Tutoatasi o Samoa ma auala ua unai ai lava fiafia ma tauvaga i totonu o afioaga eseese e pei o Asau i Savaii, o Auala i Savaii ma le nuufou o Falelauniu i le motu o Upolu.
O vaaiga nei e foliga mai o le a taatele i Samoa i le lumanai ona o le faigata foi ona tau agai atu i le taulaga auā le faamanatuina o le tutoatasi.
O le iai foi o Televise le isi mafuaaga ua lē fia alu ese ai lava ma le fale i aso faapenei auā ua mafai lava ona matamata sa‘o i sauniga o le tutoatasi mai i totonu o le fale.
