E lei toe maua mai se tala lata mai i le faatonuga a le Faamasinoga Maualuga ua ave i leoleo ina ia faia se moliaga o le lē usitai i le faamasinoga, poo le contempt of court faasaga i se tasi o matai, le tofa Faleao Evile e mafua i taualumaga o le faamasinoga i le tagi tau palota mai lea itumalo ua mae‘a nei ona faia i ai le faaiuga a le faamasinoga o faiga palota. Faaalia e le lesitala sinia, sa faia le faatonuga a le afioga i le faamasino sinia, Lesatele Rapi Vaai, ina ia sā ona talanoa nisi i le auso masaga teine sa molimau e lagolago tuuaiga a Tavu‘i Tiafau faasaga ia Asiata Wairaki.
O le faatonuga a le faamasinoga na mafua ina ua suesueina ia molimau e toalua i lo la tuuina atu o ni molimau lē moni i le faamasinoga.
Sa faatonuina foi e le alii faamasino sinia ia sā ona toe nofo se isi i le nofoa sa alaala ai ia molimau e toalua.
O taualumaga ia o le faamasinoga sa auai ma le tofa Faleao Evile. Peitai na faaalia e le lesitala o le faamasinoga, sa nofo ai i tafatafa lē ua faia i ai le poloaiga e molia, ma talanoa i tamaitai na mafua ai le faatonuga.
Fai mai le lesitala na ia fautuaina ma faamanatu ia Faleao le finagalo ua iai o le faamasinoga e faatatau i ia molimau, peitai sa faaali ane e lea tamalii ni uiga tetee i le lesitala.
O le mafuaaga lea na logoina ai loa le faamasinoga ma faia ai le faatonuga e ave i leoleo e molia i le lē usitai i le faatonuga a le faamasinoga.
O le mae‘a ona lauina le faaiuga a le faamasinoga i le mataupu mai le itumalo o Satupaitea lea ua faaleaogāina ai le tofi faipule o lea itumalo, na taumafai ai le alii leoleo sa tiute i le fale faamasino e fautua i le tofa Faleao e ave i fafo ma le potu faiga lauga a le tapuaiga o le itumalo ona e sā ona faia i totonu.
Peitai sa lē fiafia ai le tulafale ma ia tuuaia ai le leoleo i le lē mafaufau o loo feagai matai o lo latou itumalo ma lauga ua mae‘a le faamasinoga. Peitai sa faamalie i ai le leoleo e lē faatagaina ae o loo iai le avanoa i fafo o le potu faamasino. Faaalia e le alii leoleo o le a ia faia foi se moliaga o le tulafale, i le faalavelave i le faatinoga o lana galuega.
O Faleao Evile o se tasi o loo galue i le Pulega o Tagata Tafafao mai Fafo, ma o se tasi foi o fofoga o le pulega i le va nonofo ai ma nuu ma afioaga o loo agai i ai polokalame a le pulega e faatatau i le atiina‘e o tagata tafafao i le atunuu.
Ua tele tausaga o alaala i Niu Sila le tulafale, ae o le palota tele ia Mati na malaga mai ai e lagolago i tapenaga a lona itumalo auā o ia o se tasi o sui lagolago i le HRPP. Faaalia e le lesitala ua ave le tusi i le Komesina o Leoleo, ua logo i ai le finagalo o le faamasinoga, ma e lei iloa se aso e tulai ai lea tamalii i lona moliaga.
