O lea ua mae‘a se aoaoga na faatautaia e le Matagaluega o Leoleo i Ausetalia, mo leoleo e to‘a 24 mai Samoa nei ma le toaono o Leoleo mai i le Atu Kuki ma le motu o Tuvalu e unai ai le tomai o i latou o loo galulue i vaega e tali atu ai i sauaga matagā o loo lipotia i le Pasefika.
O lea aoaoga ua faaaogā ai Samoa e faatautaia atu ai, ma o le faamoemoe ina ia malamalama lelei leoleo i auala e tali atu ai i le tulai mai o nei ituaiga solitulafono i totonu o aiga aemaise isi nofoaga ua lipotia ai ia solitulafono.
O lea aoaoga na faatautaia e sui o leoleo ma fomai mai i Ausetalia ma ua manatu i latou na faatautaia, o se amataga lea o se polokalame ua faataatia mo le tausaga atoa.
O faataitaiga o valaau mai i le lautele o le atunuu e faatatau i soligatulafono matagā na folasia mo le aoaoina o alii ma tamaitai leoleo na auai atu i lenei faamoemoe.
O se tasi lava lenei o solitulafono ua mautinoa le siisii pea i totonu o atumotu o le Pasefika e pei foi o Samoa nei, ua lē ‘asa lava vaiaso ma lipoti o sauaga matagā ua faia i fanau teine a le atunuu.
O le mafai e leoleo e muamua lava oo ia i latou ua molia ma i latou ua afaina i nei solitulafono, o le auga atoa lea o le aoaoga lenei.
O le taimi muamua lenei ua faatautaia ai lenei aoaoga i totonu o le Pasefika mo Malu o le Malo.
