O le vevesi na tulai mai i le va o Vaiusu ma Vaigaga lea e mafua ai moliaga ua molia ai alii e to‘a 21 o Vaiusu i luma o le Faamasinoga.
Sa nofo taofia uma i latou nei i lalo o le vaaiga a Leoleo i le aso na tulai mai ai lea vevesi, ae peitai o le valaauga o lea mataupu i le masina na tea nei sa tatala ai loa i tua faatasi ai ma aiaiga a o tālia le toe valaauina o le mataupu.
E to‘a 20 sa tulai i le vaiaso nei ma o loo tetee uma i moliaga e faasaga ia i latou se‘i vaganā ai le toatasi e lei mafai ona auai, ua poloaia e le Faamasinoga lona tusi saisai e tusa ai ma le lē auai i lona faamasinoga.
O loo molia faatasi i latou i moliaga e tolu o le umia o auupega matautia (maa), o le moliaga o le tau‘ai maa e lamatia ai le soifua o tagata lautele faapea le moliaga o le tau‘ai o ni maa ua faaleagaina ai ni taavale.
O le toe valaau ai o lenei mataupu i le vaiaso nei, lea na faaalia ai loa le tetee o i latou na auai ma e leai se loia o tulai mo i latou. Ua toe tolopo lenei mataupu i le aso 18 ma le 19 o Mati o le tausaga fou mo le fofogaina o mau a le Itu a Leoleo.