Sa amataina le faatasiga faaleaiga poo le Family Reunion a alo ma fanau a Matapula Auega ma Katerina Matapula i le aso 26 o Tesema 2018. O lea faamoemoe sa faatinoina i totonu o le 3 aso.
Na tatalaina aloaia le faamoemoe i le saunigalotu sa taitaia lava e le Faafeagaiga EFKS i Salailua, susuga Rev. Mose Malaga FS. Na mae’a ona sosoo ai foi lea ma faaaloaloga faaleaganuu e pei ona masani ai.
E toatele i latou sa auai i lea faamoemoe matagofie, o alo ma fanau na soifua ma tutupu mai i alo e toavalu(8) o Matapula Auega ma Katerina Matapula.
Sa auai uma mai alo e toatolu o Matapula Auega ma Katerina o loo soifua e oo mai i le taimi nei.
O se fiafiaga tele lea sa tulimata’i iai alo ma fanau ina ia faataunuuina ma le manuia. Sa mafuta faatasi i lea aso taupoina, le tina ia Tatupu Matautu Le’au Loia (84 tausaga), le tina ia Siatunuu Aolele Lemusu (82 tausaga), ma le tamā ia Seinafolava Leuluaialii Auega Matapula (77 tausaga), faapea alo ma fanau ma fanau a fanau. E lei mafai ona auai mai le toatasi o alo o loo soifua pea, le tamā ia Ieru Matapula (89 tausaga) ona o le soifua ua matua, peitai sa mafai lava ona auai mai nisi o ona alo. Sa mataina lea faatasiga i le fealofaniga ma se aiga e tasi le loto.
E lē gata ia i latou e pei ona ta’ua i luga, ae sa faatumulia foi le mafutaga i alo ma fanau o alo e toafa (4) o Matapula Auega ma Katerina ua fai-i-lagi le folauga ma ua lagomau mai i tiasa: le tamā ia Matapula Tovey Matapula, Seinafolava Tulua Matapula, Taufua Tiatia Anesi Matapula ma Evelina Tagomoa.
O le faitau aofai o ē na soifua ma tutupu mai ia Matapula Auega ma Katerina e 420.
Na tapunia aloaia le faatasiga ma le Reunion i le aso 28 Tesema 2018 i le saunigalotu na taitaia lava e le Faafeagaiga o le EFKS i Salailua, susuga Rev. Mose Malaga FS. Ona faaiu ai foi lea i faaaloaloga faaleaganuu e pei ona masani ai le atunuu faapea le taumafataga tele sa saunia lava e le aiga.
Sa mataina lea faamoemoe i le faatumulia i ē sa malaga mamao mai faapea Samoa ona o le tupu ma ola o alo ma fanau a le aiga.
E momoli atu ai alofaaga ma faamanuiaga o le tausaga fou i aiga uma lava o fiafia e faitau le Samoa Times i soo se tafa o le lalolagi, auina atu ia Timuiaialaifafinelelei Ieru Leau Loia ma Toetu Loia ma le fanau ma aiga i Brisbane
