O le anavatau ma le vaai mamao o tuaa o loo tausia aiga ia maua e aiga le nofo fealofani ma le fetausia’i. O fea lava la le atunuu e aumau ai aiga ma fanau e lē mafai lava ona vavaeeseina loto o tagata ona e iai le talitonuga o aiga uma o le tagata ma lona faasinomaga o le tagata foi ma lona tupuaga.
O le tāua lea o le faamoemoe o le reunion i totonu o aiga ina ia mafai ona toe tuufaatasia ai aiga ma fanau o loo aumau i atunuu i fafo ma Samoa. I le aiga o le afioga i le Minisita ia Aupito Su’a William Sio e lua faamoemoe o lona aiga (reunion) sa faia i le faaiuga o le tausaga ma le amataina o le tausaga.
O le tuufaatasiga poo le reunion o le aiga o Aupito i Matatufu e tolu aso sa faataunuuina ai lea faamoemoe e pei ona faia i le aso 28, 29 ma le 30 o Tesema.
E ta’i tolu tausaga ma faataunuu lea faamoemoe o le aiga, ae o le lona lua ai lea o reunion a le aiga o Aupito talu ona faavae mai lenei faamoemoe.
O le lagona ma le naunautaiga o fanau i le tāua o lenei faatofala’iga i totonu o aiga ia maua pea lea sootaga lelei e fanau o loo tuputupu a’e ma ia manino ma malamalama ai fanau i gafa poo talafaasolopito i totonu o aiga. O le manaoga foi o fanau o le aiga ia faia pea faamoemoe nei i Samoa, auā o Samoa o le faavae ma le tupuaga o aiga. O le mafutaga a le aiga Aupito i Matatufu na faapaia ai ma le latou Loa e faailoa ai i le aiga o i tonu lava le nofoaga na faavae mai ai le aiga.
O le afioga ia Aupito Pupu Sio Pupu Aufata o le tuaa lea o le afioga i le Minisita ia Aupito Su’a William Sio, ma o le toe Ulutaia foi lea o le aiga o loo soifua mai, na ia ootiina le lipine e tatala aloaia ai le Loa a le aiga. O le naunautaiga o le afioga i le Minisita ia Aupito Su’a William Sio i lea Loa ina ia malamalama tupulaga lalovaoa o le aiga i tagata na faavaeina mai le aiga o tagata e talitonu i le Atua.
O le ata foi lea ma foliga o loo vaaia i le fausiaina o le Loa o loo foliga mai ai o se ata e faatatau i lima o loo tusitusi i le lagi na ala mai ai manuia i totonu o le aiga. Ma ia aua foi ne’i galo i fanau, o tuaa o tuaa o latou mātua o loo taooto uma ai i totonu o fanua o le aiga o lea o le a liutofaga uma mai i totonu o le fanua poo le Loa lenei.
O le pine faamau lea o le reunion a le aiga Sa Aupito i tausaga o loo faatinoina ai lenei faamoemoe, a faamanatu pea i fanau o mātua nei o mātua sa tausia le aiga, tausia ekalesia ma tautuaina le nuu.
Ina ua mae’a le faamoemoe o le aiga i le faaiuga o le tausaga na toe tasi ai se lagona o fanau e toe faia le isi tuufaatasiga a le aiga Sa Aupito i Samoa e pei ona iai.
Na mae’a le faamoemoe o le aiga o le Minisita i Matatufu ona toe agai atu lea i Falevao i le faamoemoe o le aiga Sa Tofae e pei ona iai le latou reunion i le amataga o le tausaga. O Tofae o le Sa’o lea o le aiga i Falevao ma faatoa lua ai lea o reunion a le aiga lea i totonu o Falevao talu mai le mafutaga (reunion) a le aiga i le tausaga 1995.
E silia i le 300 tagata sa mafai ona auai atu ai i le faamoemoe lea a le aiga i lenei tausaga e pei ona malaga atu ai suli o le aiga o loo nonofo i atunuu i fafo aemaise lava i aiga i Samoa.
O le aiga foi lenei o loo iai le latou maa faamanatu o loo tusitusia uma ai suli o le aiga. Ae o le mea e pito sili ona tāua ona ua feiloai atu ai nisi o le aiga i suli o le aiga mai Tonga ma Fiti auā e tala le gafa o le aiga i Tonga toe tala i Fiti lea ua mafua ai ona auai atu aiga nei. O le aso 8, 9 10 o Ianuari sa faataunuuina polokalame a le aiga lea Sa Tofae i Falevao.
O le auga o aute ma le manulauti o nei faamoemoega uma o le aiga ina ia mafai ona maua se nofo fealaofani o tagata uma o le aiga aemaise lava i fanau o loo tutupu a’e. Ma ia iloa lelei e tamaiti ma fanau na soifua ma fananau i fafo o le tagata ma lona aiga o le tofi lea mai le Atua.
