O le afioga ia Aupito Pupu Sio Pupu o le toe Ulutaia lea o le aiga o Sa Aupitō i Matatufu o loo soifua mai i le taimi nei. Na soifua mai o ia i le aso 10 o Aokuso i le tausaga 1938, i ona tuaa, le tamā ia Pupu Aufata mai Matatufu i Lotofaga ma le tina ia Taoa Asiata mai le afioaga o Vaegā i Satupaitea.

E to’afa le fanau a le toeaina ma le loomatua, e toalua teine e toalua foi tama ae o le afioga ia Aupito Pupu Sio Pupu Aufata o ia lea o le uii o le fanauga. O lona olaga atoa na soifua a’e lea i Matatufu a’o fai faatoaga a ona mātua i totonu o Matatufu e tausi ai le aiga ma fai ai latou aoga.

O le aoga fesoasoani a faifeau na amata ai le olaga aoaoina o le tama faasolo ane ai lea i le aoga a Felise sa fai i Apia ma oo mai ai i le aoga a Felela a Malisi. O le tausaga e 1951 o loo tau manatua e le tamā na maliliu ai ona tuaa, ae nonofo ai na’o latou. Ua fai i lagi foi le folauga a ona tuafāfine e toalua ma lona uso e matutua atu ia te ia.

Na faigaluega i le Esetete Tausi i Samoa a’o pule ai lona tuafafine ia Ate ma lona toalua i lea faatoaga i lena vaitaimi, ma o iinā sa maua ai nisi o vaega tupe sa tausi ai lona aiga ma fesoasoani ai i le tautuaina o le lotu ma le nuu. E ui lava la i le tau lē maua o ni tupe i na vaitaimi ae sa ola fiafia tagata uma auā sa taugofie le soifuaga i lena taimi ae tau leai foi ni meaai e faatauina auā sa lelei faatoaga a le aiga.

Faasolo mai le olaga o le tausaga 1963 na malaga mai ai loa i Niu Sila i le visa e tolu masina ma le tuutuuga i lena taimi e uma loa le tolu masina ona toe foi lea i Samoa ma lou pepa faigaluega e te toe foi mai ai. E malaga mai la i lena vaitaimi i Niu Sila nei ae foi atu lona uso matua sa iinei muamua foi, o ia lea sa faagaioiina pepa ma totogiina le pasese lea na mafua ai ona sau. Ina ua uma lana tolu masina na malaga mai ai, ona toe foi lea i Samoa ma lana pepa faigaluega ma taumafai mai ai loa pepa a lona toalua ma le fanau e malaga mai ai e saili se manuia o le aiga ma le fanau.

O le tausaga 1969 na faataunuuina mai ai le malaga i Niu Sila nei, ae o le taimi lea o feoai vaa o le Matua ma le Tofua e oso agai i Fiti ona pue lea o le vaalele e sau ai Niu Sila nei. Ua faamautu le aiga ma faaaooga tamaiti ma sailiili i le olaga o Niu Sila auā lava se manuia o fanau. E toavalu alo o le tamā ia Aupito Pupu Sio Pupu Aufata ma lona toalua ia Sene Tiumalu mai le afioaga o Satapuala, e toalima teine ae tolu tama.

O le afioga ia Aupito Su’a William Sio o le ulumatua lea o le fanau a le toeaina o lea ua ofi atu nei i upufai a le malo o Niu Sila ma o ia foi lea ua iai le faatuatuaga o le toeaina i mea e fai, lea ua mafua ai ona ui atu iai le ula a lona tamā i le suafa Aupito auā le tausiga o le aiga i Samoa ma Niu Sila nei.

E toatele nisi o le aiga i Samoa o loo mananao e toe foi atu le toeaina lea i Samoa e nofo ai i le aiga ona o ia le toe Ulutaia o loo soifua mai, ae o le lagona o le tamā e faafaigata ona toe foi i Samoa ona o lea ua iinei uma le fanau, ma ua tatau foi ona tulai mai a latou fanau e faaauau le tausiga o le aiga.

O le faamanatuina o le atoaga o le 80 tausaga o le tamā na patipatia faatasi uma lava e lona auaiga na malaga atu i fafo i le faamoemoe o le aiga i Samoa le reunion lea sa maua ai loa le avanoa e siitia faatasi ai le taulaga o faafetai ma le viiga o le Atua i le aiga ona ua mafai ona aulia mai e le tamā matua poo le toe Ulutaia o le aiga le atoaga o lona 80 tausaga.

E ui i ma’i o le tino o loo maua ai ae e lē o iai se popole o le tamā i nei gasegase, auā o lona loto fiafia ma le toaga e fai lana faamalositino e ala i le savali o le vailaau sili lea i lona malosi faafouina o loo maua pea i aso uma. O lana faafetai foi i lana fanau ona o le tausiga o ia lea ua mafai ai ona maua nei tausaga e tele e tautua ai pea le aiga ma le ekalesia.