Le ulugalii fou ina ua maea le sauniga o le la faaipoipoga - Photo: Digiliah Photography

Le ulugalii fou ina ua maea le sauniga o le la faaipoipoga – Photo: Digiliah Photography

Na faamamafa i le saunoaga a le susuga i le toeaina faatonu ia Rev Tanielu Mamea lea sa fai ma alavaa o le finagalo o le Atua e lu’itauina le amataina o le aiga fou o le susuga i le A’oa’o faaiuaso mai Malua ia Tautofi Junior Tuivasa ma le tamaitai ia Annesia Tumua-ua-tasi Tuigamala e faapea.

“Ia tumau ia Keriso, auā o Keriso e toatolu iai le aiga, e faavae mea uma i le alofa o Keriso, e oo foi i le ola valaauina o le ola valaau mo Keriso. O aso o totoe o le olaga ia faaaogā mo le galuega a le Atua. O Keriso e faavae ai le olaga o le tagata faatuatua ma talitonu mo lona finagalo.”

O upu faalaeiau ia ua tapena ai le amataga fou o le isi olaga taumafai o le susuga i le A’oa’o ia Tautofi Junior Tuivasa ma lona faletua ia Annesia Tumua-ua-tasi Tuigamala a’o sauni atu e toe faaauau lo laua valaauina i totonu o le aoga faafaifeau i Malua e tapena atu ai mo le galuega a le Atua.

O se aso ua tupu ai se isi taeao fou ae o se moemoe fou ua totogo a’e i totonu o aiga na lua ina ua mafai ona faataunuuina ma le manuia le osigafeagaiga a le fanau, e pei ona faapaiaina ai le aiga fou e le susuga i le toeaina faatonu ia Rev Lucky Slade o le EFKS a Te Atatu.

O aiga na malaga mai i Ausetalia faapea ma Samoa aemaise o Niu Sila nei na latou molimauina le tuufaatasia o le ulugalii fou i le sauniga i le taeao o le Aso Faraile, ae sa faapea foi ona masii mai ai ma nisi o sui o le Kolisi Faafaifeau a Malua e molimauina le aso fiafia o le latou uso a’oa’o ia Tautofi Tuivasa.

Na mae’a le sauniga lotu i le malumalu o le ekalesia EFKS i Te Atatu ona agai mai loa lea o le mamalu o le auvalaaulia ma le paia o aiga na lua faapea ma le ulugalii fou i le hall i Malaeola ma faaauau ai nisi o polokalame o le aso.

Le ulugalii fou ma a la aumea mamae - Photo: Digiliah Photography

Le ulugalii fou ma a la aumea mamae – Photo: Digiliah Photography

O le tofa ia Suasolomai Lafu Talataina na faafeiloaiina le mamalu o le auvalaaulia faapea foi ma le saofaiga a susuga i faafeagaiga ma o latou faletua faatasi ai ma le faaulufaleina lea o le aiga fou ma aumeamamae.

O le susuga i le A’oa’o faaiuaso mai Malua ia Penitala Kolose o le failautusi foi lea o le aoga sa fai ma Fofoga o le aso. O faafiafiaga eseese mai le ekalesia EFKS a le tamaitai faaipoipo mai Ranui faapea ma le ekalesia a le susuga i le A’oa’o mai le EFKS i Manurewa faatasi ai ma faafiafiaga a le Kolisi mai Malua sa fai lea ma molimau ola ae o faamanuiaga molipo foi lea mo le aso fiafia o le A’oa’o ia Tautofi Tuivasa ma lona faletua ia Annesia Tumua-ua-tasi.

O le tofa ia Autagavaia Felagai Taito o le sui o le ekalesia EFKS Ranui sa fai ma Fofoga o le aso e tu tootoo i le taimi o faaaloaloga ae o le afioga ia Tuiloma Fuimaono Faatitipa o le sui o aiga na lua sa momolia le agaga faafetai o aiga na lua i le mamalu o le auvalaaulia faapea susuga i faafeagaiga ma o latou faletua i le auai atu ua maulauga ma matagofie ai le faamoemoe o le fanau.

Na tali fuaitau le sui o le auvalaaulia i le tootoo o le aso e pei ona saunoa iai le tofa ia Togia Vaega e faafetaia le paia o aiga na lua e tusa ai ma faaaloaloga aemaise o le matagofie o le aso o le fanau ona o le galulue faatasi o aiga.

O le lagona poo le fu’a taualuga o finagalo o tuaa o le tamaitai faaipoipo le susuga i le faafeagaiga ia Rev Filemoni Tuigamala ma le faletua ia Alpha Tuigamala, o le laua lea tatalo faifai pea i le Atua ia faaaogā le ola o le fanau mo lana galuega. E tofi mai lava e le Atua lana fanau mo lana galuega o ai lava e finagalo iai e faaaogā e tumau pea lo laua loto e ofoina atu le ola o le fanau mo ia.

E pule foi le Atua i le lumanai o le fanau. I le valaauina o le ola o le fanau i le finagalo o le Atua, e lagona ai lava le faamaualalo o laua loto i le Atua ona ua faataunuuina pea le finagalo o le Tamā i le lagi mo fanau.

O le susuga i le A’oa’o ia Tautofi Junior Tuivasa sa galue ma lotu i le ekalesia EFKS i Manurewa, o lona tausaga faaiuaso lenei i Malua ae o lea ua ia filifilia le tamaitai ia Annesia Letumua-ua-tasi Tuigamala la te toalua i le galuega a le Atua. O se aso o lenei vaiaso e toe tapena atu ai i Samoa le ulugalii fou i le Kolisi Faafaifeau i Malua auā le faamae’aina o aoga.

O alofaaga ma faamanuiaga o le aiga fou mai o laua aiga na lua faapea uo ma ē masani aemaise o laua ekalesia EFKS Manurewa ma le EFKS i Ranui i le susuga i le faafeagaiga ia Rev Filemoni Tuigamala ma le faletua ia Alpha Tuigamala na momoli i lo laua aso fiafia. Ia manuia le aiga fou.