O nai vaiaso talu ai na ooti aloaia ai e le susuga i le faafeagaiga Rev Ropati Ariu Toleafoa le lipine mo le tatala aloaiaina o le maota o le galuega.
O le latou uluai aseta lea ua faamau faailogaina ai le tupu ma le ola o le tovine talu ona faavaeina.
O le masina ua tuanai na osia ai le feagaiga a le ekalesia lenei i Melton ma la latou faafeagaiga ma le faletua ia Nuutofi, lea na tumutumu ai Melton i malo ma valaaulia e le gata i falesa taitasi uma o le EFKS i Vitoria ae faapea foi le mamalu i valaaulia ma Samoa na potopoto e molimauina le osigafeagaiga i le mavae ai o sina vaitaimi o faatali i le Atua mo so latou leoleo mamoe.
O le tasi lenei o pitonuu o le aai o Melepone ua televave le nopia’i ai o le paia lautele o nai o tatou tagata, e ui lava foi i le tele o nisi tapuaiga eseese ua amataina sauniga i Melton, ae viia le agalelei o le Atua o loo ia alofagia lava le lenei tovine tau atia’e.
Alofagia e le Atua ma faalautele i lana tovine aemaise o soifua galulue o lana auauna ma le faletua, tainane se tautua a matafale taitasi o le ekalesia.
