O i latou sa auai ile fono na usuia ile Aso Toonai 15 o Setema ile Maota fono a le Aiga Samoa North Brisbane Deception Bay

O i latou sa auai ile fono na usuia ile Aso Toonai 15 o Setema ile Maota fono a le Aiga Samoa North Brisbane Deception Bay

O loo faatumauina pea le galulue faatasi o le Komiti lenei e ala i le lagolago malosi a tupu ma tamalii, aemaise tua’a sinsina o le atunuu i Kuiniselani Ausetalia. E pei ona silafia pea lenei mataupu o loo vavāō ai le lalolagi, ae le o itiiti le finau a lenei mafutaga ma sui i isi tafa ole kelope, e aofia ai Kuiniselani ina ia faamaua’a pea talitonuga ma finagalo o tagata, lagolago ma tutū faatasi ina ia maua se tasi.

O le mau tauave a le Samoa Soofaatasi i le lalolagi atoa, “Soloia le tulafono 2008 poo le Repeal LTRA 2008”.  O le aso Toonai 15 o Setema, sa faataunuuina ai le fonotaga a le SSIG Queensland Australia Incorporated i le Maota Fono Aiga Samoa North Brisbane i Deception Bay. Ua mae’a le fonotaga i Inala, Goodna faatasi ai le itu i Matū, ae ua fuafua o le masina fou e see atu ai i le itumalo o Logan City.  O nei fonotaga faasolo i aai o Kuiniselani e pei o polokalama a le VEU i Samoa, faatasi ai ma le fuafuaina o ni fesoasoani aua le faamoemoe ole SSIG Lawsuit, e mamā lava se avega i le pulupulu lima faatasi, o le tele foi o popo e sua ai se lolo.

Komiti ma ē o loo faaauau pea la latou lagolago

Komiti ma ē o loo faaauau pea la latou lagolago

O le talitonuga maumaututū male mau tauave a le SSIG ma Samoa o auai i fonotaga, “O le mataupu autu pei ona faatuina ai le Samoa Solidarity International Global, poo le Samoa Soofaatasi ile lalolagi atoa, ole tutū faatasi lea o tagata-nuu o Samoa e soloia ma faaleaogaina le tulafono lea na pasia faasoli tulafono i le tausaga e 2008. LTRA 2008.”

E tāua tele le faaavaeina o le SSIG (overseas) o loo mafai ai ona minoi le talanoa  e ala i seleni e feoai ai i nuu ma alalafaga e faapupula atili lenei mataupu (Walk the talk). Ua faatuputeleina le faagaeetia o nisi nuu ma alalafaga auā o le manino o le mata o le vai, o le faigofie foi lena ona iloa atu le isi itu lagi.

O loo faatagisia lava La’ulu se vaa ia goto ma tagi i le mamalu o le atunuu (sui resitala) mo ni fesoasoani. E iai nisi e seāseā auai mai ile mafutaga ona o le mamao o nofoaga ae ua tuuina mai lava a latou seleni i le account a le SSIG Queensland Australia incorporated, e fai sao ai i lenei taumafaiga. O nisi faagaioiga e aofia ai le sausage sizzles e ala i le fesoasoani mai a le faleoloa o Bunnings, e faaaogaina o latou lumāfale.

O le komiti faafoe o lenei mafutaga:    

Peresitene: Malotutoatasi Vaimoso Semaia.                                                        

Sui peresitene: Fiu Tuipala Malu.                

 Failautusi: Susana Meleisea.                      

 Sui failautusi: Helen Lauaki.                            

Teutupe: Auapaau Talalelei Pauga.            

Sui teutupe: Muliagatele George Salā.    

Advisor: Laulu Pelepesite Ah See