O le tala fiafia lenei ua foi ma le mafutaga a tina Katoliko i Matatufu i Samoa ina ua maea le latou sailiga seleni e ala i le latou posiva lea sa faatinoina i le faaiuga o le vaiaso i le komuniti hall i Otara. Ua mae’a le latou aitalafu i Samoa i le galuega o le fausiaina o le maota o le faifeau lea sa feagai ma le ekalesia. O tina o le pae ma le auli o latou foi e faamafolafolaina ni mea ua faaletonu i totonu o le ekalesia ma aiga. O le iai o le aitalafu a le ekalesia i Samoa i le fausiaina o le maota o le faifeau i Samoa lea e silia i le $50,000 lona aofai sa iai i totonu o le kamupani sa auala atu ai le faatinoina o lenei galuega, sa le nofoai ai tina i le latou manatunatu ma magafagafa lelei poo fea e sailiili matagi iai aua le totogiina o le aitalafu.
Ua taulamua tina i mea e fai ai sailiga seleni, e pei ona latou faia ai se luau i Samoa e amata totogi ai lenei aitalafu, peitai ane e lei gafatia e lenei luau ona faamaeaina le totogiina o le aitalafu, ona toe talanoa lea o le mafutaga a tina e sailiili matagi mai i Niu Sila nei aua se isi fesoasoani mo lenei lava faamoemoe. Ma o lea sa tasi moemoe ai le mafutaga a tina e sau le malaga i Niu Sila ma le fuafuaga e saili lava le pasese o le tagata latou.
O le afioga ia Tauiliili Surita Tauanuu Levi o le tina lea o loo iai lana pisinisi suisui ma lona fale ofu i Samoa, o ia lea sa tu malosi ma faamalosi au i tina o le mafutaga e tatau ona faamalolosi ma galulue e saili pasese e malaga mai ai e apogi le faamoemoe aua le aitalafu a le ekalesia. E toasefulutasi le auamalaga a le mafutaga na malaga mai, ma sa totogi lava e le tagata lona pasese faatasi ai ma le faamautu o le tagata lava ia i lona aiga. O le afioga ia Tauiliili Surita Tauanuu Levi o lo o taitaiina mai lenei malaga ma le faamoemoe maualuga e tatau ona maea ona totogi atu iinei le aitalafu o loo totoe e $30,000 ma ona tupu.
O le aso Toonai na faia ai loa le latou po siva i le komuniti hall i Otara ma sa vaaia ai le alofagia e alo ma tama fanau o Matatufu o loo i Aukilani o le faamoemoe o le malaga mai o le mafutaga a tina o le ekalesia aemaise ai o uo ma e masani. Na maualuga le faamoemoe o tina ina ua auai atu iai le afioga i le Minisita ia Aupito Su’a William Sio e apogi le faamoemoe o tina, ma o le afioga foi i le faipule sa tatalaina sausaunoaga o le aso.
O le susuga ia Fuaava Seko Uti sa fai ma fofoga o le aso. Ua le itiiti le lima foai ma le valevale alofa o le atunuu aemaise o aiga, ua fai o seleni na tapena iai, ae ua oo foi i taumafa sa fai ai le taumafaga, sa galulue ai lava aiga ma tina na malaga mai i Samoa e fai gasesega nei aua le fofoga taumafa o le atunuu sa lagolago atu.
E $21,897.00 le maau ma le lima foai o alo ma tama fanau o Matatufu aemaise o uo ma e masani sa galulue faatasi i le sailiga seleni a tina, faatasi ai ma le $3,000 sa maua i le latou siva muamua lea sa fai ae lei faia le po siva.
I le lagona o le afioga ia Tauiliili Surita ua maea lelei ona totogi le latou aitalafu i le tupe lea ua maua ma o le a foi i Samoa ma le loto ua tumu i le fiafia ma le malie i aiga ma tama fanau o Matatufu aemaise o uo ma e masani i le tali manao ma le tali valaau o lea ua mama ai le latou aitalafu. O le tala moni o le talalelei lea mo aiga o le ekalesia ona o le’a galulue ma lolotu fiafia aua ua mama lenei avega.
Na faaiu le faamoemoe o le aso i le saunoaga a le afioga i le Minisita ia Aupito Su’a William Sio, lea na momoli ai lona agaga faafetai tele i tina i le ola magafagafa ma le fautua lelei o lea ua taulamua ai i le sailia o mea e lelei ai le nuu ma le ekalesia aemaise o aiga. Ua faailoa foi e le Minisita ia Aupito i le mafutaga a tina, a uma le lua tausaga ona toe sau foi lea o se isi malaga i le lumanai.
Na momoli foi le agaga faafetai o le taitai malaga ia Tauiliili i le mamalu o le atunuu aemaise o le afioga i le Minisita ma lona faletua i le faaavanoaina atu o laua taimi e lagolago ai i sailiga seleni a lona nuu i Matatufu.
