“O outou faalupega o Malu o le Malo, Malu o le atunuu lenei, malu o aiga uma lava.
O le tou galuega o le puipui lea o tulafono ina ia nofo filemu lo tatou atunuu o Samoa. E tua atu tagata vaivai ia te outou ma e tele naunau foi luitau e feagai ma outou ona o le tomiga lena tout e laei ai o le toniga o le paoa, o le toniga ete mimita vale ai ona faaseseina ai lea o oe”. O upu amata ia o le saunoaga a le afioga i le Palemia o le Minisita o Leoleo le susuga Tuila’epa Lupesoli’ai Sa’ilele Malielegaoi i le faau’uga o leoleo e toa 114 ua avea nei ma Malu o le Malo.
O se saunoga na ave ai ma lapataiga ma fautuaga ma le faamanatu o Samoa ose atunuu e latalata sootaga ma gafa, peitai e galo ai i leoleo ona fai le amiotonu ae ua faamuamua ai o latou aiga ae tuu le tulafono.
“E lelei le tou silafia lelei le mea lenei ina ia outou ‘alo’alo ese ai”. E iai le isi mea taua e avea ma vaivaiga o Malu o le Malo, i le tulaga o le galulue faatasi o alii ma tamaitai.
Oute manatua le taimi na faato’a faamamalu ai tamaitai ua ofi i vaega’au o le sami, e toatele nisi o fitafita tama tane na molia ai ona ua latou faamalosi i faiga faamanu nisi o tamaitai”.
E pei la o le manatu faatama tane a le ma’ito se tamaitai leoleo e le’o se tama tane”. Na faalautele le finagalo o le Palemia ma ia afea ai le toe fenofoa’i o leoleo ma fai ai le faaaiga i mataupu ae lafoai le faia o le amiotonu. O le fautuaga foi lea a le Palemia i le Komesina o leoleo ina ia silasila e fai sana faai’uga i leoleo o loo nonofo faapouliuli ina ia taofia ma titina ia amioga.
O le ‘au’au o le finagalo o le Palemia ona o lana silasila ile tele o mea ua tutupu ma aliali mai i totonu o le matagaluega, e fesootai uma i le ma’i o le toatele o ulugalii ua galulue i le tautua faaleoleo ma ua fetosoa’i solo ai ma faai’uga talafeagai e tatau ona faatino.
O le tausaga ua mavae na ave ai le tusi a le Palemia i lona tulaga o le minisita o leoleo i le komesina le afioga Fuiavailili Egon Keil, ina ia filifili le ulugalii leoleo poo ai e nofo ao ai e tuua le galuega, ae sa ave ai foi ma le tuualalo e fai se faaiuga i leoleo o loo faia a latou faanunumi. “Lau afioga i le Komesina aua ete fefe e fail au faai’uga aua o loo iloa uma e leoleo i latou o loo latou galulue o loo faia le amio lea, ma e tatau ona oo atu i le faai’uga o le tausaga nei ua faatino sau faai’uga”.
