“O le ala i le pule o le tautua.” O le soifua tautua e aotauina mai ai finagalo aemaise o le tofā ma le tomai mo le soifua faaletaitai. ua sefulu ma le lima tausaga o tautua le afioga ia Fepuleai Alesio Mulipola mo le Iuni a tagata faigaluega a Ausetalia (Australian Manufacturing Workers Union – A.M.W.U.).
I totonu o lea taimi umi sa ia maitauina ai nisi o ana uo aemaise o nisi o alii ma tamaitai pule o matagaluega eseese a le Iuni, ua taufetuli ma tauva i faiga palota e le gata i palota faaleitumalo poo City Council, ae faapea foi palota mo sui Faipule faasetete (states M.P.) o le toatele lava o sui tauva mai Iuni eseese a tagata faigaluega e faamanuiaina, o le ala foi lea e tele ai sui Faipule o le Setete o Vitoria e masani ma uo ma le afioga a Fepuleai.
Atonu o se tasi lea o mafuaaga o le tonu o lona finagalo o le a tamoe tauva mo le palota o loloma nei mo sui faaitumalo poo palota mo le City Council. Saunoa Fepuleai, o le sini autū o lona faamalosi ina ia tauva, o le asaina lea o le gasū mo le mamalu o Samoa o nopiai ma sailimalo i Melepone.
Na ia saunoa foi, na o le Atua e ati lana silafaga ma silafiaina le lumanai, peitai a lē manuia le faamoemoe i lenei tausaga, o le a lē faavaivai ai, e toe fuafua foi mo le isi fa tausaga o lumanai e toe tauva ai foi.
E toatele nisi o ana uo ma ē latou te masani na ui mai ai foi faapea, e lei manuia i le taimi muamua. O nisi e lei manuia i le taimi lona lua foi, ae na taumafai pea ma taumafai pea seia oo ina faamanuiaina.
O sana saunoaga i se faatalatalanoaga i luga o le siufofoga o Samoa le Apu F.M. i Melepone na ia saunoa ai, o lona finagalo ia fai o ia ma faataitaiga i alo ma fanau a Samoa.
A mafai e tagata o isi atunuu, e tatau foi la ona mafai e alo ma fanau a Samoa ona tauva ma ofi atu i upufai e le gata i faiga malo faa-Setete, ae faapea foi le faiga malo tele a Ausetalia, e mafai lava e tagata uma ona oo i ai.
O le afioga a Fepuleai na soifua ane i le afioaga o Manono, o le aiga lea o lona tamā, ae o le aiga o si ona tina o le afioaga o Saleaula lea e suafa mai ai, ae ua tele lava ina faamautu i Leauvaa pe a malaga i Samoa ona o le aiga lea o si ona faletua.
O le afioga a Fepuleai, o loo avea ma taitaifono o le faalapotopotoga o le Leo o le Pasefika (Voice of the Pacific) lea o loo taulamua i le finauina o le suiga o taumafai le malo tele o Ausetalia e sui ai visa mo tagatānuu o Niu Sila e fia malaga nofomau i Ausetalia.
O se suiga o le a pagatia ma mafatia ai tagata Niu Sila pe a oo ina pasiaina. E toasefulu ma le ono i latou o tauva mo nofoa e fa o le itumalo o Moreland. Tau ia ina ia faaifo mai le Lagi se tali o le faamoemoe i le Aso Toonai, aso 27 o Oketopa.
