Malaga i le galuega ma lē toe foi mai ai lava

Ua motu le soa ma ua taloto moemoe. Ua to le timu ma ua tafea le tauofe. E momoe a ma manū ae sau mala e atiae. Na lilo i manatu ma faamoemoe o se taimi lenei e  momotu faafuasei ai le mafutaga i le malaga sauā a le maliu ma le oti.

O le tea o le tasi i le aoauli o le Aso Faraile, 28 o Setema 2012, na maliu faafuasei ai le tofā ia Vaelepua Tutia Ponā a o faataunuu ona tiute i lona fale faigaluega. Na oso sona gasegase ma auina atu i le falemai, peitai na lē manuia taumafaiga. Talofa na faaulugata le tala faamomoiloto na logoina ai le tausi ia Foini ma le nofoaalo, peitai o faamafanafanaga a aiga ma uo na maua ai se toafilemu.

O alalafaga o le tofā ia Vaelepua Tutia Ponā o Vaigaga ma Mulifanua, ae o le tausi ia Foini Tutia Ponā e mai Taga ma Nofoalii.

O le afiafi o le Aso Tofi na tea nei na faia ai ona sauniga faaleaiga i le malumalu Ekalesia Katoliko sa taitai e le Afioga ia Patele Epati Tamati, ae o lona falelausiga na faia i le taeao o le Aso Toonai, 6 o Oketopa.

O le afioga ia Toleafoa Simi Togia Faamaile Leota sa valaau faaaloalo i le paia o Samoa i se mālūafiafi ae o le tofā ia Tupai Lealaitafea sa pulea le tausamaaga ma fai fofoga o le faamoemoe. Na ogatasi le futia ma le umele ina ua fetaui fola ma afa e tasi finagalo i le fetalaiga ia Lealuga Vaitofaga e fai ma sui o Samoa potopoto, auā se agaga faafetai i le paia i aiga ga lua e tusa ma matu palapala faapea le tausamaaga.

Na iu manuia mea uma. Tau ina ia tafimala le faigamalaga a le tamā, ma iai faamaisega i le tausi ia Foini ma le fanau faapea aiga faanoanoa.