O le tulai mai o le House of Décor, o le pisinisi a se alo o Samoa, e manumaloina se tasi o vaega o faailoga a le NZ’s Top Shop Award, i mea tau pisinisi i totonu o Niu Sila, ua avea ai le susuga Lautofa Tulagalua, o ia le uluai Samoa ma o le uluai tagata Pasefika foi lea, ua ia manumaloina lenei faailoga, le People’s Choice Award i lea tufagā faailoga (Top Shop Award). E lē gata i lea, sa mautulaga foi Lautofa o se runner up i le Single/Small Business Award 2015.
O lenei tufagā faailoga na faia i le Aso Tofi, 30 Iulai 2015 i le SkyCity i Aukilani, ma e molimauina le silia ma le 600 tagata mai tāfa eseese o le lalolagi o le aufaipisinisi i totonu o lenei atunuu aemaise lava i le faaitu lenei o Aukilani, le Upper North Region.
Ina ua tulai Lautofa e talia lona faailoga, sa muai momoli lana faafetai i le Atua o lē na foai maia lana taleni ma le malosi o loo faatino ai. Sa ia faafetaia foi i latou na faatautaia lenei polokalame tāua, aemaise ai lana faafetai i ona aiga, o uo ma aumea mamae, i lo latou lagolagosua ma le taputapuai a o alo i ona faiva, i le finauina o sona tulaga i nei faalagamaea e tele ina fao uma ma ave e papalagi ma tagata faipisinisi iloga faailoga tāua, ae o lenei ua ese mai ai le 2015, ua filo filo ai ma le Samoa, ae o se Pasefika, e lē gata ina filifilia i ē pito i luga e faia i ai filifiliga faaiu (finalists), ae o lea lava na manumaloina e le House of Décor se tasi o award i lea afiafi.
I se faatalanoaga ma le susuga Lautofa, na ia ta‘ua ai o le 2002 na autovaa mai ai i Niu Sila, ma amata loa ona silasila i le amataina o lana pisinisi lenei o le teuteuina o nofoaga e faia ai ni sauniga tetele aloaia. Sa amata muamua i lana tamai pisinisi sa matele i le tuiina o teu fugalaau ma sa faamautu i Henderson, ae ua alu alu lava ma ua amata ona lauiloa tomai o Lautofa i totonu o Aukilani, ma iu ai loa i le tausaga e 2010, ua see mai loa i le taulaga faatau i Onehunga ma tatala ai le pisinisi lea e pei ona iai nei, le House of Décor. Saunoa Lautofa, e ui e fou lana pisinisi i Niu Sila, ae o se pisinisi ua leva ona faia e ia ma lona aiga i Hawaii, sa latou galulue faatasi ai lava ma nisi o ona tuafāfine ma tausoga, peitai o le tulai mai o le House of Décor, o loo faagaioia toatasi lava e Lautofa, ma nisi pe toatasi pe toalua e fesoasoani ia te ia i nisi o taimi. E pei lava o le tele o pisinisi, e lei faigofie le amataga mai o lenei pisinisi. Na molimau Lautofa, e tele luitau, ae o ia o se tagata e ola finau, e lē fiu gofie, ona e malosi lava lona talitonuga, afai o lana taleni lea mai le Atua, e mautinoa lava la e iai le auala o loo faasino mai e le Atua e tatau ona faatino ai seia oo ina ia faamanuiaina ai o ia.
O nisi taimi a o tau amata faalauiloa lana tautua, fai mai Lautofa, o aso la, pe $100 tala e tuu mai e se isi na te teuina ai se hall telē e lē taitai ona foi ai. O nisi foi taimi aemaise lava mea a tatou Samoa, e matuā leai lava se tupe e totogi ai ia, ae totogi i le mau faamolemole ma le tau faa‘ole‘ole. Peitai sa ia faia ma le fiafia, o le mea sili ia te ia i lena taimi, o lea ua amata ona lauiloa atu ai ma iloa e tagata le ituaiga o galuega e mafai ona ia faia, ma le atoaga o le matagofie o mea na te faia.
I taimi a o leai sana taavale, o nisi aso afai o se faaipoipoga poo le ā se mea faapena e fai i se Aso Toonai, e alu lava e tapena ma fai teuga o lena hall poo se falesa i le afiafi o le Aso Faraile, ma faanoi ai lava e moe ai iina i le hall, auā le toe faaumaina o ana teuga i le aso e sosoo ai. E iai taimi na maligi ai ona loimata ma fesili ifo poo afea o le a faaeaina ai o ia, peitai sa tatalo ma tuu i le Atua ana taumafaiga uma, aemaise sa ia talitonu, a faaauau pea ona galue punouai, ma faaaogā lana taleni e tauala atu ai lana fesoasoani alofa i isi aemaise lava i ona tagata Samoa, e telē lona talitonuga e taui mai e le Atua lona loto alofa sa fai.
Lenei la ua tulai mai le House of Décor, ua lē na o ni meafai a tagata Samoa ma le Pasefika o loo tautuaina e Lautofa, ae ua tele meafai i aso faapitoa a le malo, i matagaluega eseese a le Malo, o ekalesia, o faalapotopotoga, ua matuā lē malolo le vaega a Lautofa i le tele o mea e faatonu mai na te teuteuina.
Ta‘ua e Lautofa, o le taimi nei ua oo ana bookings i le 2020, ma e lē o toe misia se vaiaso ma sana galuega e fai, ae o na foi galuega, ua lē o toe tilotilo i ni seleni laiti e totogi mai ai, o le ala foi lena o le matuā ola ola o le tulaga ua iai nei lana pisinisi.
E lē na o Lautofa o loo faia lenei ituaiga o auaunaga, peitai e ese lava foi ma tutasi mai lana ia sikaili i le auala o loo ia teuina ai mea, aemaise lava e taumafai ina ia atagia mai ai teuteuga faaatumotu i le tele o taimi, ae faafefiloi foi i nisi teuga e tusa ai ma le manaoga o i latou o loo autu i ai ni faamoemoe. O le tele o teuga ua iai nei i le House o Décor, e ese mai ana teuga faasamoa, e sapalai sa‘o mai lava i le Iunite Setete o Amerika, o loo galulue mai ai nisi o ona tauaiga e fesoasoani i le sapalaia mai o lana pisinisi i Niu Sila nei.
E tele taimi e faaaogā ai e Lautofa measina a le atunuu e pei o le siapo ma le ietoga, o nisi o teuga o loo sili ona mataina i lenei atunuu. I le talanoa atu i lenei alo o Samoa, sa ia toe faamanatu mai ai, o ana mea uma lava e fai, e taulai lava lona mafaufau i si amataga faatauvaa na amata mai ai.
O le mafuaaga lena, e oo foi i mea na te faaaogāina e pei o fasi siapo poo ni fasi ietoga e tipi ese se‘i tulou mai ni mea e fai, e lē taitai ona ia tia‘ia pe lafoai, ae teu uma lava auā o le ata lea e tau pea i ai lona mafaufau, o se mea faatauvaa poo se mea ua lafoaia, e mafai ona fanau mai ai se mea silisili ma faatamaoaigaina ai oe, pe a e faamaoni i le faaaogāina o na mea.
O le susuga Lautofa Tulagalua e mai le afioaga o Satapuala. O lona tuaa tamā e mai Satapuala ma Paia i Savaii, ae o lona tina e mai Malaemalu i Falealili, ae o ia lava na soifua ane i Satapuala i Aana. O ia foi o se sui o le SCOPA i Niu Sila nei. E momoli le faamalo ma le faafetai i lenei alo o le atunuu, i le saili malo ma le tausinio i mea lelei, ma o lana fautuaga lava mo soo se tasi o loo mafaufau e amata se pisinisi poo le ā lava se auaunaga e maua ai se seleni, ia fai ma le faamaoni, faatulaga ou sini, ona e galue faamaoni lea ina ia ausia lena sini, ma alofia le fiu gofie ma le faalogologo tiga, ma ia faamoemoe i le Atua.
