Ua leva tausaga o laumanu‘ia tala o kokeni, ma aisa o ni pauta faasāina e malolosi tele ma ogaoga o latou aafiaga o loo salalau lona tulaga maua i atunuu i fafo. Fai mai tala salalau i vaipanoa o le taulaga o Apia i na tausaga ua alu, ua oo mai i Samoa ia ituaiga o pauta faasāina.
Ua iai nisi o mataupu na muamua atu na maua ai e leoleo ia latou osofaiga, ae sa tele ina maua aisa ma totoga e faaaogā e ula ai, ae seāseā ona maua ni nofoaga o gaosi ai.
O le osofaiga a leoleo i Samoa i le tau faaiuiuga o le vaiaso ua mavae atu nei, ua mautinoa ai ua saoasaoa le ulufale o le aisa i le atunuu, ae o le fesili pe faapefea ona sao mai ae o le molimau a ē o loo nafa ma le leoina o tuaoi o loo ulufale mai ai vaa o le sami, o vaalele ma tagata feoai o loo malu puipuia vaega uma.
E faapena foi se fesili o loo fia maua i ai se tali, i le itu i laau malosi ona e lē o ‘asa se osofaiga a leoleo i ni mataupu tau laau faasāina poo maruana ma maua ai fana, ma o le tele lava o a‘upega e maua e lē faatagaina ona aumai i Samoa.
O le toafā o tagata ua taofia nei ma molia e leoleo i le mae‘a o le osofaiga na alu i Afiamalu i le Aso Tofi ua mavae o loo aofia ai ma se tasi o tagata sa molia muamua foi i lona umia o paipa ma isi ituaiga o totoga e ula ai le aisa.
O Stewart Webber Ulberg na molia i ia solitulafono ae sa lē faamaonia ia tuua‘iga muamua. O lea ua toe pueina e leoleo i le latou osofaiga na maua ai ni laau malosi se lua e lē faatagaina i le atunuu, faapea ni aisa na maua, o totoga e gaosia ai lea pauta faasāina, o ni maruana ua mamago, ma se tinoitupe e silia i le $20,000 tala Samoa.
O tupe Amerika, Niu Sila ma Ausetalia ma le luasefulu afe tupe Samoa na maua i le fale na agai i ai le osofaiga.
O le faamatalaga a se leoleo sinia na iai i le taimi o lea galuega, e mamao lava i tua se nofoaga o loo tu ai se fale matagofie sa nofo lisi ai i latou ua taofia e leoleo. Fai mai lea leoleo sinia, o le auala e agai i pou faasalalau i le mauga o Fiamoe, e tea mai ae alu le auala uma le ta, oo i le vaega leaga o le auala faatoa tau i le nofoaga o loo iai le fale.
I le faamatalaga mai le Komesina o leoleo ina ua feiloai ma tusitala i le aoauli o le Aso Tofi ina ua mae‘a le osofaiga i le aso lava lea, o soo se nofoaga e maua ai gaioiga solitulafono faapea, e lē gata ina maua ai ma a‘upega, o tupe ma pauta faasāina ae o loo iai foi le maliu ma le oti.
Peitai e faafetaia e le Komesina le mataalia o leoleo e toatele na auai e leai se soifua na afaina, ae sa sologa lelei tapenaga uma. Na maua ai foi ma ni telefoni feaveai se fā o nisi ia o meatotino tāua a tagata ua molia o loo faaaogā nei e leoleo ia latou sailiiliga.
O le fana o le ituaiga o le sniper rifle ma le fana puupuu o le 45 semi automatic na maua faatasi ai ma ututau o ia a‘upega. E toalua tamaitai o loo aofia i le toafā o loo molia ma se alii e na o le 17 tausaga faapea le susuga Stewart Webber Ulberg.
O loo faagasolo pea suesuega a leoleo ma e iai le talitonuga e iai nisi tagata o le a faaono molia faatasi ma le toafā o loo taofia i le vaaiga a leoleo. E lei iloa se aso e tutulai ai i latou i le faamasinoga maualuga.
