O soo se tagata mai fafo e oo i tagata Samoa sa ulufale i atunuu o loo malosi le pepesi ai o le faama‘i matautia o le Ebola, e lē talia ona ulufale mai i le atunuu pe a maua e lei atoa aso e 21 e tatau ona faia ai ni ana siaki poo saogalemu mai lea gasegase.
O le aiaiga lea o tapenaga ua taoto a le Matagaluega o le Soifua Maloloina i Samoa mo puipuiga o le atunuu mai le Ebola. Faaalia e le susuga i le alii fomai o Robert Thomsen i le pulega o le Matagaluega o le soifua maloloina a le atunuu, o le mafuaaga lea na lē mafai ai ona talia le ulufale mai i Samoa o se tamaitai mai fafo na taunuu i le malaevaalele i Faleolo i le amataga o le masina na tea nei o Iulai.
“Sa maua i faamaumauga o le tamaitai sa i totonu o le atunuu o Liberia o loo pepesi ai le Ebola, ae na sau i Samoa i le ui ane i Ausetalia”. Faaalia e le alii fomai e lei atoa aso e 21 o le tamaitai e tatau ona nofo ai pea i lona atunuu ona faatoa malaga mai lea i Samoa.
O alii leoleo mai Samoa o loo galulue i atunuu Aferika e pei o Sudan ma Liberia i tiute o le puipuiga a Malo Aufaatasi na faaalia e Robert Thomsen afai e toe foi i Samoa e lē mafai foi ona ulufale i le atunuu pe a lē atoa aso e 21 ua aiaia e tatau ona nonofo ai i fafo tagata uma na ulufale i atunuu o loo iai le Ebola, ona faatoa mautinoa lea ua saogalemu le malaga mai i le atunuu.
Na faamanino e le alii fomai lea aiaiga ina ua faia se galuega a le soifua maloloina i le amataga o le masina na tea nei, na togafitia ai le tamaitai mai fafo na maua sa ulufale i Liberia ae e lei atoa le 21 aso ae malaga mai i Samoa.
O le falemai fou i Faleolo sa faia ai ia togafitiga o le puipuiga ma toe faatonuina ai lea tamatai e toe tuua le atunuu. E lua vaiaso o tapunia le falemai i Faleolo e lei toe faaaogāina ona o puipuiga o le saogalemu.
Faaalia e Robert o le matautia o le pepesi vave o le Ebola ma aafia ai soifua o tagata o le itu sili lea ona popole i ai le matagaluega. O le isi itu sili ona tāua o le lē toe manaomia o se faama‘i e pei o le Spanish flu lea na taia ai Samoa i le tele o tausaga ua mavae ma toatele tagata na maliliu ai.
O le faama‘i tele lena ua fai ma logo tagitagi i taitai o le Malo ma le matagaluega ia aua ne‘i toe aliali mai ni tulaga faapea i le atunuu. E pei ona silafia e le au faitau nusipepa, o le faama‘i tele lea na tupu i taimi o pulea Samoa e Niu Sila ma sa tuua‘ia ai lea Malo i le faatamala i gaioiga o le puipuiga.
