O le au a Samoa na tulaga tolu

Na maua e le ‘Au Triathlon a Samoa  le Pine Apa-memea ina ua tu tolu i tauvaga-au a tama ma teine i taaloga a le Pasefika. O Sosefina Sooa’emalelagi, Teofilo Molioo ma Darren Young o sui ia o le ‘au a Samoa. O Tahiti na mua, tu lua New Caledonia ae tu tolu ai Samoa. O le tuuga lenei na faitau ai le taimi a tagata e toatolu o atunuu. O le tulafono foi, e tatau ona iai le teine e tasi i le tuuga lea na ofi ai Samoa e toalua tama ma le tamaitai o Sosefina.

O le taimi muamua lenei ua maua ai e Samoa se pine i le taaloga o le triathlon mai taaloga Pasefika e fa na tauva ai. O le uluai taaloga o le 1984 na avea ai le tamaitai o Mati Sapolu ma sui, sosoo ai ma Ray Reupena na tauva i le 2007, sosoo ai ma Raea Khan na tauva i le 2011 i Noumea. E lei iai se sui i Papua New Guinea i le 2015.

I le taaloga i Apia e toalima sui o  Samoa na tauva na toe auai ma Teleiai Raea Khan i le ‘au o le 2019. O isi o Darren, Sosefina, ma Tiatia Eperu Maisa ma Joseph Kupa.  Na faaletonu taumafaiga a le ‘au ina ua mama’i le toalua o Sosefina ma Raea ae toe tolu aso oo i tuuga. E ui na faaletonu le manava a Sosefina i le aso o le taaloga ae na tauva pea, ma ausia ai le Pine apa-memea triathlon muamua a le atunuu.

I taaloga taitoatasi o Darren Young na tu valu i le to’a 21 na tauva. O le malosi lava o le taaloga e nofo ma atunuu Farani e iai Tahiti ma New Caledonia. E lima pine auro a Tahiti na maua ae tasi New Caledonia ae faasoa ia Fiti ma Samoa pine apa-memea.