Faapaleina Fetui Gaye Nofosao Tuetue i le Miss Samoa NSW

O le moemitiga a se tamaitai Samoa, o le fia faia lea o sona sao ma sona aogā e tautua ai i ona tagatānuu, aiga, nuu ma lona atunuu. 

O le ala foi lea o le momoo o alo tamaitai nei e toafa sa soifua a’e ma alala ai i le setete tele o Niu Sa Uelese, ma latou faatagisia ai le faamanuiaga ma le lagolago a nai o latou mātua, aiga ma paaga, i le faataunuuina ai lea o ia moemitiga. 

E ui lava la ina e lē mua uma ni Sa o se tausinioga, ae ua tau lava o latou faamoemoega ma faanaunauga, ina ia tausinio lava mo se avanoa e manumalo ai, ma mafai ai loa ona faatinoina lea faamoemoe. 

O le po la o le Aso Faraile i le Maota o le Aria Fiction Centre i Wetherill Park, na faataunuuina ai lea moemitiga mo le tamaitai o Fetui Gaye Nofoaalo Tuetue, ina ua tasi i ai le finagalo o Faamasino, o ia o le a faapaleina e avea ma ‘Tausala Samoa NSW’. 

O se tauvaga na matuā faigata ona faia i ai se faaiuga a Faamasino, ona o le lelei ma le maoa’e o le faatinoga uma a tamaitai i lea po. Ui i lea, e tatau lava ona iai se isi e manumalo, auā e lē mafai ona faapaleina uma i latou. E matua momoli ai lava le faamalo i matua ma aiga, ae faapea foi pisinisi ma kamupani sa latou lagolagoina le faamoemoe aemaise lava i tamaitai tauva. 

E faapitoaugafa se faafetai ma le faamalo, i le pulega a le Miss Samoa NSW, ona ua le gata i le matagofie o vaega uma o le po, ae faapea foi le tapenaina o Tausala uma o le tauvaga. O le pine, ona ua leai lava se fati na gase pe o se peau foi ma lagavale i le faaiuga, ae ua na o le lagona lava o le fiafia ma le loto faafetai o tagata uma.

Isi tamaitai sa tauva i lea po – Photo: VS Photography (Virginia & Stephen)

Se ua faamalo ma ua malie foi malo, i la outou faaaloalo. E lē uma le agaga fia faafetai i tamaitai uma o le tauvaga ma le sailiga o se tausala o Samoa i Niu Sa Uelese, ona o lo outou finagalo faatausala ma le uiga tamalii ma le tauagafau sa outou faaalia i lea po. E ui lava ina ua pale lo outou uso, ae o outou uma lava lea ua faapaleina ona o lo outou uiga faatupu ma le agaga faaeaea i lo outou uso, na vaaia lava i lea po. O le saunoaga taualoa o le po, na fofogaina lea e le Tausala Samoa NSW ua malolo aloaia nei, le tamaitai ia Retalila Temareti, na ia toe faamanatuina ai i tamaitai tauva uma, le tāua o la latou pitolaau o le tamaitai Samoa. Ae na auga lava i le tamaitai o le a faapaleina, ina ia maua i taimi uma, o ona tiute na lana matafaioi, o le avea lea ma maatulimanu aupitoaluga, e taulai uma i ai lagona ma faanaunauga o soo se tamaitai Samoa lava. 

Na taualuga ona saafiafiga i lana toe saasaaga faasamoa na ia matua toe faaali uma ai i lea saasaaga, le mafuaaga na faapaleina ai o ia o le pale o le Tausaga Samoa NSW o le 2018-2019. O ia lava foi, i lana toe auaunaga mulimuli o le Tausala Samoa NSW, na ia faapaleina ai loa le tamaitai o Fetui Gaye Nofoaalo Tuetue o le Tausala Fou o Samoa NSW 2019-2020. Ua avea ai nei foi le tamaitai o Fetaui ma uluai tausala ua ia paleina le pale fou lea na faato’a tatalaina ai i lea lava po, na tapenaina ma saunia mai i le atumotu o le Atukuki.  Ia alo ane loa la’ia lau afioga i le Tausala o Samoa NSW, Fetaui Gaye Nofoaalo Tuetue e fai ou faiva auā le sailiga o se Tausala Samoa ia Setema 2019, ae o le a tapuai lou atunuu ma tagata Samoa o Niu Sa Uelese. Ia pouliuli lou tino, a ia maua malama lau silasila, o ou mama na. O le tamaitai ia Maria Prycilia Fayth Stewart Wong-Samoa Teinaki 21 tausaga sa tulai mai le 3rdrunner up, o le tamaitai ia Regina Sarah Luitoso e 19 tausaga sa tulai mai i le 2ndrunner up, o le tamaitai ia Zenaider Moevale Faagaitaua Vitale 20 tausaga sa tulai mai i le 1strunner up ma le tamaitai ua faapaleina nei i le Miss Samoa NSW o Fetui Gaye Nofosao Tuetue e 21 tausaga.

Faafetai ai le auaunaga a le Samoa Times i le afioga ia Maureen Sala Lotuola Papalii-Afoa ma le Pulega a le Miss Samoa NSW, ona o le amanaiaina pea o matou auā se lipoti mo le faamoemoe o Tausala Samoa.