O le faamoemoe ua taunuu o le laau o le soifua lea. Isaraelu e, a galo oe ia te au ia pipii ane lou laulaufaiva. O le opogi ma le lagolagoina o se mafuaaga tatau, i le afiafi o le Aso Faraile, 27 Fepuari 2015, na faaalia ai le lagolago a le atunuu i le maimoaina o le koneseti muamua a le Toomaga sa faaigoaina o le “Voice for the Voiceless”
E 4 ni ausiva na faafiafia ai e aofia ausiva mai Rarotonga (Sounds of Polynesian) ausiva fefiloi (RDM) Nuholani ma le ausiva teine Samoa ua faaigoaina o le Nesian Pearl, faatasi ai ma nisi o alo iloga o le atunuu i le musika, Tina Vaasili, Grace Vanilau, ma le Mika’s Sisters e faasino i alo o le faafeagaiga ia Rev Fetulima Mika ma le faletua, ma le ausiva e tasi mai le atunuu o Toga (Iviti’s Sisters).
O se afiafi o le olioli ina ua faataunuuina ma momoli le feau ma le mafuaaga tonu o le koneseti, e lē gata i lena a o se savali momoli mai i luga o Internet e le susuga ia Richard Parker, i lona talisapaia o le faamoemoe, ma ia tauaaoina ai se foai e ala i ana CD ma DVDs ma le fagumalosi mo le lulu, faapea foi le auaunaga a le Kiwi Pacific Store i se tasi o foai e ala i le fofoga taumafa (hamper] le fetalaiga ia Taloto Junior ma le tausi ia Bec.
O le auga o aute o le faamoemoe, o le lagolagoina o nisi o alo ma fanau ua tuuina i lalo o le vaaiga a le Toomaga i Samoa. Faailoa le agaga faafetai o le komiti a le Samoa Victim Support Group Melbourne Network, i le talisapaia ma le opogi a le atunuu e ala i le aao foai, ma mealofa eseese, aemaise o aufaafiafia uma.
O le SVSG Melbourne Network ua 5 nei masina talu ona faavaeina ma o se faalapotopotoga ua tele i fanau na soifua a‘e i Niu Sila ma Ausetalia. O le Faatonu o le afioga ia Toilolo Talosaga Taulapapa; o le Teutupe o Toafa Nansen; o le Failautusi o Christine Filia, ma le Laulau e aofia ai Chantelle Afualo, Sissy Aumua, Pricilla Mika, Samson Brown, ma le lagolago a le faletua ia Pei Taulapapa. Faafetai Melepone mo le lagolago.
