O le talitonuga o nisi o tagata lolotu e lauga le pese, e vivii foi i le pese, ae lē gata i lea o le pese na te faamāmāina se galuega o le aso ma ni mafatiaga, aemaise lava i pese ua ta‘ua o pese lotu.
O le tasi lenei o Ekalesia ua maitauina le agai foi i luma o le taleni ma le meaalofa ua tuuina i ai e le Atua o le lagiina o ona viiga. E lē gata i totonu o Niu Sila nei ae faapea foi Ausetalia ma Samoa.
O le afiafi o le Aso Toonai 14 o Mati na faatumulia ai le malumalu o le Ekalesia o le Livigisitone Magele i aiga, o uo ma ē masani ae faapea foi sui o ekalesia o le Worship Centre o loo i totonu o Aukilani na auai faatasi uma atu e lagolago ma patipatia le faamoemoe ua leva ona tapenaina e le susuga i le faafeagaiga ia Leauli Ieriko ma le faletua ia Eloi Ieriko ma le ekalesia i Magele.
Sa faatasi mai ai foi le taitai aoao o le Ekalesia Worship Centre i le lalolagi le susuga i le Aposetolo ia Viliamu Mafoe ma lona faletua ia Lavina Mafoe.
O le faafeagaiga lagolago ia Elia Taualapini na taitaia le viiga e amata ai le sauniga, ae o le susuga i le faafeagaiga ia Leauli Ieriko, o ia o loo tausia le galuega i Magele na faafeiloaia le susuga i le Aposetolo ia Viliamu Mafoe i le laugaina o le upu folafola a le Atua.
O le Fofoga o le po na vaavaalua ai le susuga ia Paul Ioane ma le susuga ia Elia Taualapini. O nisi sa pepese ai i lea afiafi o Salom Abegail S Sapolu, Penehuro Ma‘aseia, Sefo Kapeteni ma Apelu Fonoti Ifopo.
O le igoa o lenei CD “Let It Rain” (Timu Mai poo le Uaga o Faamanuiaga) o le pese na tusia e le susuga ia Daniel Lama Mua, ona o se pese na muamua tusi ma usuina i totonu o le ekalesia ma faamanuia ai loto o tagata, ma ua ia iloa ai e manaomia le timu o faamanuiaga e faasūsūina ai o tatou loto i aso uma ma taimi uma, faatasi ai ma le afi o le Agaga Paia e susunuina ai o tatou tagata tuai ae ia avea o se tagata fou e auauna i le Atua e pei ona ta‘ua e le tali o lenei pese.
E 10 pese o loo i totonu o lenei CD e 7 pese na tusia e le susuga ia Daniel Lama Mua, 2 pese na tuufaatasia e le faletua ia Mareta Lelani Sapolu ma le pese e 1 na tusia e le susuga ia Ken Mataia Luatua. O le tele lava o pese na usuina i lea afiafi auā lava le faafofoga a le atunuu, ma sa faatauina ai foi ma le CD i le $25.00. O le mae‘a ai o le polokalame na ootiina ai loa le lipine e le faletua ia Lavina Mafoe ma tatalo faaiu ai le susuga i le faafeagaiga ia Leauli Ieriko mo le tapunia aloaia o lenei faamoemoe.
O le maualuga o le tatalaina o lenei CD o meaai faaleagaga na laulauina e le susuga i le faafeagaiga ia Viliamu Mafoe ae faapea foi i pesepesega faaleagaga, ae liliu ane i le taumafataga i le itu i le tino na matuā siamupini ai le po i kuka eseese na saunia lava e le Ekalesia, ua taunuu ai le upu e tatau ona paleni lelei le tino ma le agaga. Viia le Alii!
Ae na faailoa se finagalo o le susuga ia Daniel Lama Mua, o ia lea sa telē lona sao i lenei faamoemoe, e 8 tausaga na taumafai mai ai lenei CD, ae o lea faatoa mafai ona toe tuufaatasia i le 8 masina seia oo mai lava ina tatalaina.
O le mafuaga na umi ai, ona o le toatele o nisi o loo galulue i totonu o lenei team e fai si pisi i galuega, o le tele foi o le faavaivai ma tele foi o faafitauli. Ae o lona agaga faafetai i le Atua ua tau lau o le faamoemoe ua leva ona nofo tatalo ma tapuai ai le faafeagaiga ma lona faletua faapea nofo a tofi o le Ekalesia ma le Aupaia.
O Daniel Lama Mua sa taulamua i le faatinoina o lenei faamoemoe a o lei malaga ese atu mo Ausetalia, o le tele foi o pese na ia tusia ma fatuina lava a o galue ai i totonu o Magele, ua galue foi i totonu o se tasi o Ekalesia Worship Centre i Ausetalia, ae sa fai lava ma malaga mai i Niu Sila ona o le naunau lava i le fatu na totō e le Atua e ala i le CD a le Worship Centre a Magele. O le susuga ia Emanuel sa pueina ma tuufaatasia lenei CD i le umi e 7 masina.
10 pese i le CD fou a le Ekalesia Worship Centre a Magele – LET IT RAIN
• O le taimi lenei
• My soul praise the Lord
• Le Ali‘i afio mai
• Let it rain
• Ia vi‘ia Oe Iesu
• Agaga Pa‘ia
• Jesus Loves me
• Ou te Manumalo ona o Iesu
• Lord we welcome You
• Avatu lo‘u nei leo
