Ua valaau le Atua i Lana Lupe sa faalele

Ua logo tulimanu uma o le lalolagi i le tala faavauvau. Ua valaau le Atua i Lana Auauna. O lē sa pulunaunau i ala ma magaala. Sa lē mapu le taualaga auā le Atua ma Lana Faaolataga. O lē sa tu i le too, sa tautai a‘e auā le Ekalesia Samoan Assemblies of God i Niu Sila ma itu e fia sa oo atu i ai lana auaunaga.
O le lupe a le Atua sa faapea ona faalele auā Lana Talalelei. Ua malolo mai feau ma tiute o le ola nei, ae ua mapu atu i Lona Matai i le malologa e faavavau.
O le Toa o le Galuega, o se tamā alofa, o se Taitai mataala ma sogasogā i vaega e lelei ma manuia ai le Ekalesia. O se uo i le toatele o soifua sa faapea ona soifua ma tutupu a‘e i totonu o le Ekalesia Assembly of God.  Le tamā ia Rev Dr Pulepule Samani Pulepule.
O se Auauna sa galue malosi ma tulivae i le Atua ina ia maua ni faaaliga auā le taitaiga o le Itupa Samoa i le saolotoga mai le Atua. Saoloto le tapuai, saoloto le umia o a latou meatotino, saoloto le vivii ma agaga i le faaolataga.
O le afiafi o le Aso Lua 4 o Iuni sa faamanavaina ai e le Atua galuega a Lana Auauna, ina ua tuumalo o ia pe tusa lea o le itula e 7 i le afiafi. O se faigamalaga na faigofie ona tuuina atu lona sa e alu ina ua mautinoa ua valaau mai ai Lona Matai e mapu atu ia auā ua mānava ana feau, ua mae‘a galuega sa auina mai ai i lenei lalolagi lē tumau.
O le susuga i le Toeaina, Dr Rev Samani Pulepule o le uluai faifeau lava lea o le Ekalesia Assembly of God i totonu o Niu Sila nei i le itupa Samoa. O lona naunautai lava ina ia ola le Galuega a le Atua ma ia fananau mai nisi Ekalesia Samoa ina ia saga faalauteleina ai le Faaolataga i nai o tatou tagata.
Sa faapea ona malaga mai ma lona faletua ia Sapapalii lea foi sa lagomau atu i ona tofaga tumau i le vaiaso i tua atu ma nai o la alo e toatolu i le tausaga e 1967.
O le tausaga lava foi lea sa faatūina ai ma le lotu Assembly of God i Grey Lynn i le auala ua faaigoaina o Francis St. O iina lava sa faapea ona luluina ma totōina ai le fatu seia oo ina fua ma salalau atu i le tele o fata faitaulaga sa faatutūina mai ai isi Ekalesia e pei ona iai i le taimi nei.
E tuumalo nei le susuga i le Faifeau Malolo Manumalo e tusa lea ua 88 Ekalesia o loo iai i lalo o le faamalu o le Ekalesia Samoa sa faavae mai i lalo o lana taitaiga i le tele o tausaga. Na amata mai i le tausaga 1967 ina ua faatūina le uluai Ekalesia Samoan Assembly of God i Aukilani nei ona avea le susuga ia Rev Samani Pulepule ma Taitai Aoao o le Ekalesia seia oo mai i le tausaga e 2011.
O le taimi lea na faatoa malolo mai ai o ia i ona tofiga ina ua avea ma Faifeau Malolo Manumalo ma si ona faletua ia Sapapalii lea foi ua fai i lagi le folauga pe tusa ma le vaiaso atu i ona tua. E tele ni galuega lelei sa faavae mai le soifua auauna a le susuga Rev Samani faapea ai ma si ona faletua a o avea i laua ma Taitai o le Ekalesia Aoao.
O nisi o molimau ola o a la galuega lelei o le faatupulaia pea lea o le fuainumera o Ekalesia e faatutū i totonu o Niu Sila. O le ata lea o le mumū saesae o le lamepa sa tuuina e le Atua i o laua lima ina ia faasusulu atu lona malamalama, ma o le upu moni o i laua lava o le malamalama o le Atua.
O se tasi o ana moemitiga poo vaai mamao sa ia faasoa ai lona finagalo ina ia iai se hall e tua i ai tupulaga o le Ekalesia Aoao i faamoemoe fai o le lumanai, lea na fanau mai ai le Samani Pulepule Center i Magele, o se tasi o hall ua loa lona sao i faamoemoega a Samoa atoa.
Ua lē gata ina tua i ai tupulaga ma le Ekalesia, ae ua faasafua ona avanoa i soo se Samoa auā faamoemoega e pei o faatasiga a nuu, o mafutaga a Ekalesia e fia, faapea ma faaipoipoga ma maliu, o nisi ia o vaega ua aogā i ai lenei moemitiga.
O le tausaga 2010 sa faaee atu ai e le AGAPE Bible College se faailoga Dr of Divinity i le susuga ia Rev Samani Pulepule o le faailoga lea e amanaia ai lona sao ma lana auaunaga, o lana tautua matavela i le Atua e ala i tagata ma o latou soifua faaleagaga.
O le a matuā misia lenei Auauna e le toatele o tagata aemaise lava i latou sa faafailele ma fofoa mai lo latou soifua faaleagaga i totonu o le Ekalesia Samoan Assembly of God i Grey Lynn i le tausaga e 1967.
E oo mai i le taimi nei o loo iai pea nisi sa faavae maia lenei Ekalesia, peitai o le toatele foi o nisi o tamā ma tina matutua ua fai i lagi a latou folauga. O le a lē faigofie ona faagaloina lenei tamā, auā o se Auauna sa faamuamua i lona soifua le Atua atoa ma tagata. Sa pele ia te ia lona valaauina, ma sa ia uumau i lou lima taumatau lona usitai i le faia lea o le Finagalo o le Atua i aso uma o lona soifua.
O si ona faletua ia Sapapalii sa lagomau i lona oliolisaga tumau i le aso 1 o Iuni o le Aso Toonai lea, ae o le Aso Lua, aso 4 o Iuni lea na valaau ai le Atua i lana Auauna. Ua taunuu upu o loo faapea ona tusia i le Afioga Paia a lo tatou Alii. “Le Auauna lelei ma le faamaoni, ulufale maia i le fiafia o lou Alii”.
Amuia ē e valaau mai lona Matai ae o loo faapea ona Galue pea ma tumau i lona valaauina.  O toe sauniga uma o le susuga ia Rev Samani Pulepule o loo faasalalauina lea i le tatou nusipepa ma luga o le Radio Samoa 1593 AM.
Fai mai tala a tagata na ou faalogo i ai, ua alu lava le Auauna e tuliloa atu le sa o si ona faletua ina ia o la taunuu faatasi i le lagi. Peitai o la‘u mau, ua valaau mai le Atua i Lana Lupe sa faalele ina ia foi atu ia i fanua.
Foi atu ua malie Lona finagalo i lana olo sa olo ai i le lalolagi. Foi atu i fanua se‘i malolo ai ma si ona faletua, e faatalitali ai le aso e talisua faatasi ai ma lo la Atua, o Lē sa o la auauna i ai i le lalolagi o fita ma faigata. Le lalolagi o timuga ma lāina. Le lalolagi o fiafiaga ma faanoanoaga.  Le lalolagi o faaosoosoga ma tofotofoga. Ae o lea ua a‘e mai ai ma le manumalo o la faiva alofilima.