Ua alualu nei taufetuliga a kamupani telefoni o le Digicel ma le Bluesky i Samoa ae ua vaaia le sosolo ane i luma o le fautasi o le Bluesky i tauvaga faapisinisi i le faaaogāina o auala tau fesootaiga i luga o initaneti lea ua faailoa ai lona aumaia i Samoa o fesootaiga e ta‘ua o le WiFi.
Ua faaigoa la e le kamupani lana fesootaiga fou o le Bluezone e pei ona maua ai e soo se tagata le malosi ma le saoasaoa o le initaneti i soo se vaega o le atunuu i Upolu faapea ma Savaii.
O le Digicel o loo iai foi lana fesootaiga faapea o loo faaaogā ai lana tautua tau telefoni feaveai, peitai e iai le talitonuga ona o lea ua muamua le Bluesky i le WiFi o le a oo foi i ai le Digicel i se taimi. O le Bluesky o loo umia le malosi o fesootaiga e lē gata o le initaneti broadband ae faapea foi i telefoni laina poo le landline system ma lana telefoni feaveai.
E lē tau lesitalaina se tagata e manao e faaaogā le WiFi Bluezone e pei ona faailoa e le alii pule sili o le kamupani ma o se faiga e lē toe tele ai le gasu e tapena pe a fia maua se fesootaiga initaneti.
Fai mai le Bluesky e aogā tele le fesootaiga lenei mo tagata e malaga tafafao mai i le atunuu aemaise lava o tatou tagata e asiasi mai i aiga ona o nisi o fuafuaga. O le totogi o le auaunaga fou e lē o faailoaina mai ae o se tasi lava lea o itu o loo tatalo i ai le toatele, ia vave maia se aso e taugofie ai le totogi o le initaneti i Samoa ona o loo molimauina e fai lava si maualuga o le totogi pe a fua i atunuu i fafo.
O le WiFi foi e pei ona silafia e nisi o lo tatou atunuu o loo alala i fafo e faaaogā fua i nisi o auaunaga tau fesootaiga televavave faaonapo nei. O loo talosia ia alualu lava oo i ai ma le tautua lenei a le Bluesky.
O nofoaga nei ilo tatou atunuu ua maua ai lea tautua:
Upolu Island
• Amanaki Hotel
• Aga Reef Resort-Lepa
• Bean Central
• Bluesky Maluafou
• Bluesky Retail (Matafele)
• Camp of Samoa (Aleisa)
• Chan Mow Plaza
• Fagalii Airport
• Le Manumea Hotel (Vailima)
• Le Rick Hotel (Vaitele)
• NUS Fale Samoa (Toomatagi)
• McDonald’s Restaurant
• Orator Hotel (Aleisa)
• SPA Complex (Matautu)
• Sails Restaurant (Sogi)
• Talanoa Fales (Moamoa)
• Vaea Hotel (Lalovaea)
• Tifaimoana Hotel (Fugale)i
• Apia Central Hotel (Savalalo)
• Seabreeze Hotel (Lepa)
• Litia’s Beach Fale (Lalomanu)
• Faofao Beach Fale (Lepa)
• Sinalei Resort (Siumu)
Savaii Island
• Bluesky Retail store Salelologa
Manono Island
• Manono Resort Manono-Tai
