(otootoga mai talafou)
O le ata tifaga faamatala o le atoaga o le limasefulu tausaga o le Tutoatasi lea na faailoga i le tausaga talu ai, sa faalauiloa i le po anapo i le faletifaga o le Apollo i Apia lea sa auai taitai o le Malo ma malo valaaulia.
O se ata ua faaigoaina o le Folauga a Samoa mai le tausaga e 1962 e oo mai i le tausaga e 2012 na atoa ai le limasefulu tausaga.
O se tasi lea o fuafuaga a le komiti o le Tutoatasi na atoa ai le Iupeli Auro o le sisigafu‘a sa pueina ma tuufaatasia e le kamupani o le Juniper Films ma o se tasi o minisita o le kapeneta o se tasi o taitaifono o le komiti, Afioga Fiame Naomi Mataafa, sa taulamua i le tuufaatasia o le talafaasolopito o le tutoatasi, lea na saunoa i le sauniga anapo na faalauiloa aloaia ai lea taumafaiga, o le a avea ma se tasi o pine o talafaasolopito o le atunuu auā tupulaga o le lumanai.
Na faasalalauina foi lenei ata i faletelevise o loo faagaioia faapisinisi i le po anapo ma e iai le talitonuga o le a avanoa foi le mamalu o Samoa o alala i atunuu i fafo ona maimoa i lea ata i se taimi e lē o toe mamao.
O se tasi o taumafaiga faapenei o se ata faamatala foi poo se documentary ua faaigoaina o le Samoana, o loo faamatalatala ai Samoa ma ana sailigamalo ma taimi o pulega a isi malo, faapea nisi o puapuaga na aafia ai i taimi o pulegamalo a Niu Sila, o le faama‘i tele lea e faitau afe ma afe tagata o le atunuu na maliliu ai.
