Manumalo Penina M. Paeu Miss Samoa World

Ua toe ofi atu Samoa i le Tauvaga o le Tausala o le Lalolagi i le manumalo ai o le tamaitai o Penina Maree Paeu i le faaaliga i le faaiuga o le vaiaso. E 21 tausaga le matua o le tamaitai lenei ma i le mae‘a ai o le 25 tausaga talu ona alu ese Samoa mai i lea tauvaga, o lea la ua manumalo le Tausala Samoa o Niu Sila i lenei tausinioga faavaomalo.
E na o le toafā tamaitai na tauva mo le Pale o le Miss Samoa World ae o le tumutumu o aiga aemaise o le atunuu e molimauina lenei tauvaga e pei e toatele lava ni sui tauva.
O le vaiaso atoa lea na faagasolo ai le faaaliga ma le tauvaga lenei e pei ona iai le tauvaga o faatalatalanoaga, o le tauvaga o ofu taele, o le tauvaga o le tagata e ata lelei ma le anoanoai o isi tuutuuga o lenei tauvaga.
O le tauvaga o le po lea na faatāua ai le poto e tali fesili, le laei e faailoa ai tu ma aga faa-Samoa ma e tuufaatasi uma togi o le vaiaso ona faatoa faalauiloa lea o le tamaitai ua manumalo. E maeu foi le tali mai o aiga i Samoa nei o tamaitai tauva ma o se tulaga lea na faafetaia e i latou na faafoea lea tausinioga faavaomalo. O le tausala muamua o Samoa na pale i le Tausala o le Pasefika, le tamaitai o Verona Parker na faapea ona fofogaina le polokalame o le tauvaga ma na molimauina le toatele o le malo faapea le au faipisinisi na auai atu i lenei tauvaga.
O le tausaga muamua lenei o lea tausinioga ma le faamoemoe o le a toatele atu i latou e tauva aemaise o ni tamaitai mai i Samoa nei mo lea tauvaga i tausaga taitasi.
O le faafitauli tele lea ona e foliga mai e lei iai se fesootaiga i le va o i latou e faatautaia le faaaliga o le Tausala a Samoa ma le Pasefika ma i latou ua faatautaia le Tauvaga lenei o le Miss Samoa World.
Sa iai foi le tele o faaseā a nisi o le atunuu ona o le vaai lea i le leai o se tamaitai mai i Samoa nei sa tausinio ai peitai na ta‘ua e le tamaitai o Teeva Matafai na faatautaia lenei faaaliga i Apia, o le taumafaiga lava ia e tatala foi i tamaitai i Samoa nei ae na feiloai ma le alii Palemia, o le Minisita foi lea o le Tausala Samoa e ala i le Pulega o Tagata Tafafao Maimoa mai i fafo, ma o ia lava na sau ai le faatagaga e faagasolo loa le tausinioga i Samoa ma le faamoemoe o le a faalautele atu i le agai i luma.