Na mafua ona auaufaatasi Peseta Vaifou Tevaga ma Laaulialemalietoa Leuatea Polataivao Fossie Schmidt e faatau le kamupani nonu ua vevesi ai nei, ona sa avea i laua ose uo mamae.
“O la‘u uo lelei ma sa ave iai lo‘u faatuatuaga,” ole tagi talatala lea ale faipule ia Peseta.
Oi laua uma nei e lē gata o faipule sinia ole faigamalo oloo tulai mai nei ale HRPP, ae o ni tamalii ua iloga mai i o la itumalo, aiga, ekalesia ma faiganuu, ma ua ave foi iai le faamoemoega ole taitai ole Malo, le alii Palemia.
Na tofia ai Laauli ma fofoga ole maota i nofoaiga ua tuanai atu, ae tofia Peseta Vaifou ma Minisita lagolago ile afioga ile Palemia.
Ae ole vevesi oloo finauina nei ona o tupe maua sa tatau ona totogi ai le loan ile NPF, ae lē o tupu lena tulaga, i lalo ole puleaga a ona faatonu, e toatolu e aofia ai ma le atalii o Peseta.
O Peseta ma Laauli sa pei e aiaiuli mai tua o faatonu, e leai ni o la suafa i luga o faamaumauga faaletulafono o tagata e ana le kamupani nonu. Ae o faatonu faaletulafono e aofia ai Apulu Lance Polu, Martin Schwalger ma Danny le alo o Peseta.
Ile taimi ole faamasinoga na ta‘utino ai e Apulu, Martin, ma Laauli, e leai ni a latou tupe na lafo poo faaaogā foi ile faatauga ole kamupani nonu mai le amataga.
Na ioeina ele toatolu lenei, o Martin e faia masini ma taavale ale kamupani, o Apulu o lana fesoasoani ile faagaioiga ma Laauli o lona mafaufau.
Peitai i lalo o faamaumauga ale kamupani, e leai se suafa o Laauli o iai faapea foi ma Peseta mai le amataga.
Ole faigauo “ua ou toe foa ai lava i a‘u tama,” ole tala lea a Peseta. Peitai na taumafai lava e maua se tupe mai le faagaioiga ole nonu i lea taimi ina ia totogi ai le loan ile NPF, ona ua faaletonu peimeni ma ono mamulu ai le fanua o Peseta na faamau ai le aitalafu tupe.
Ua faaauau ai lava ona finau Peseta ina ia maua se tupe mai nonu faatau atu i fafo e totogi ai le loan, peitai ua faitau miliona tupe maua mai nonu faatau atu i fafo ale Kamupani ae ua sameme ai le loan e lē o faamaoni ona totogi e ona pule faatonu.
Ina ua ave e Peseta le mataupu ile faamasinoga, ae mulimuli ane ai o faatonu e leai ni latou tupe na faatau ai le kamupani, ae na o latou agai i leoleo ma molitu iai Peseta ise tuua‘iga ua lē mafai ona latou faamaonia, e pei ona fofogaina ai ile vaiaso talu ai, le togi i fafo ele faamasino ia Mata Tuatagaloa ole faamasinoga maualuga i Mulinuu o moliaga uma faasaga ia Peseta.
E oo mai nei, e lē o gaioi lava leoleo ile tagi a Peseta na faaulu i leoleo e faafetaui ai le tagi na faia e Laauli, Martin ma Apulu.
Na tagi Peseta i leoleo ina ua ia maua faamaumauga ile tele o tupe maua ale kamupani nonu i lalo ole pulega a faatonu o ta‘ua i luga ae lē o totogia le loan.
Ua fiu Peseta ma lana loia e tuliloa le tagi lea a Peseta i leoleo, ae leai lava. Peitai ole tagi tonu lava lea a faatonu oi luga na ave i leoleo faasaga ia Peseta na mafua ai le faamasinoga ile vaiaso talu ai, ma toe foafoa uma ai lava latou.
Ole taimi nei, “pe ana totogi le loan i tupe maua o nonu semanu e oo mai ile taimi lenei ua mae‘a le loan ma leai se matagā faapenei.” Ae ole mea ua tupu ua sui e uo le igoa ole kamupani, ma faaletonu ai, ae fesiligia ai loa poo fea o ave iai tupe na maua mai le va lea sa tatau ona totogi ai le aitalafu i tupe a tagata faigaluega, NPF.
Ole vaiaso nei, lea ua aapa atu ai loa Peseta i leoleo pe aisea ua faatuai ai ona latou faagaioi lana tagi faapei ona vave le latou gaioi ile tagi a Martin, Apulu ma Leuatea na mafua ai lenei faatāsina o latou uma.
Ole vaiaso nei foi ua aapa atu ai Peseta e tuliloa lana tagi ua uma ona faaulu, e suesue ai tupe maua ma le mea o faaaogā iai, lea e talitonu e iai foi ma se aafiaga o faletupe na latou talaina i tua siaki faitau selau afe o faatau na maua ale kamupani nonu.
