Ua sauni le afioga Peseta Vaifou Tevaga ma lana loia e faaauau le tagi poo le su ua mae‘a ona faila ile faamasinoga faasaga i faatonu ole Kamupani nonu ole Local Partners and Associates i Vaitele, ina ua mae‘a ona lau le faaiuga o ona moliaga solitulafono ua lē mafai e leoleo ona faamaonia ma ua faamamā ai lona suafa mai tuua‘iga.
Ole tofa Apulu Lance Polu ma Martin Jonathan Schwalger o faatonu ia ole kamupani nonu ae ole susuga Laauli Leuatea Polataivao Schmidt ose sui lagolago ole kamupani. Oi latou ia na faia le tagi i leoleo na tuua‘ia ai Peseta i lona faia ose gaioiga faaalatua ma le saini faamalosi ole suafa o Martin Schwalger ise tusi na ave ile ofisa o Leipa e aveese ai le suafa ole atalii o Peseta ose faisea ole kamupani ae tuu iai le suafa ole Minisita lagolago poo le afioga ile faipule o Faasaleleaga Numera 4.
“Oute faafetai ile tapuaiga a lo‘u aiga ona ua mae‘a le faamasinoga ua faamaonia la‘u tetee i moliaga auā e leai se mea sese na ou faia, ae o la‘u fesili pe ole a ou avea se su, ole tali ole tulaga lena ole a iai”.
Na faaalia e Peseta ua faaleaga lona suafa faapea ma lona aiga aemaise o lona tofi faipule ile tagi na faasaga ia te ia, ae oloo silasila le Atua ile amiotonu ma le faamaoni ole mea na tupu. O lona finagalo sa taumafai lava i latou na faia le tagi e saili se mea e aveese ai lona tagata, ae o lea ua aumai le amiotonu ale faamasinoga. “Oute matuā faanoanoa lava ile mea na tulai mai ae sa ou onosai ma tuu atu ile Atua e aumai lana amiotonu, a lea ua aumai”.
Ole afioga Leulua‘iali‘i Olinda Woodroffe ole loia lea sa finauina le tetee a Peseta i moliaga. Faaalia e Leulua‘iali‘i lona fiafia ile taunuuga ole faamasinoga ma lana saunoaga ole a avea le faaiuga o moliaga o Peseta e avea ma feau e momoli atu mo isi oloo feagai ma ni tuua‘iga ua faia e leoleo ae lē sa‘o.
O lana luitau foi lea ile atunuu ia aua ne‘i fiu gofie pe solomuli e saili le amiotonu pe afai e silafia ma talitonu e lē moni ni moliaga ua aafia ai. E pei ona silafia a‘o faagasolo le faamasinoga sa molimau le afioga ile Minisita o Faatoaga ma Faiga faiva le Susuga Laauli Polataivao Leuatea Schmidt e lagolago moliaga a leoleo faapea ma faatonu ole kamupani nonu.
Ae ile itu a Peseta sa molimau le tamaitai loia le afioga Maiava Visekota Peteru ma ia lagolago le tetee a Peseta. O Maiava ole loia lea ale kamupani nonu na tapenaina le tusi na saini ai Martin Schwalger ma isi e faamaonia ai le aveesea ole igoa ole atalii o Peseta ose tasi o faatonu, ae suia ile afioga ile minisita lagolago nate tauaveina le tulaga ose tasi o faatonu ma faisea ole kamupani.
Na faaalia e Peseta i lana molimau, na mafua ona ia aveesea lona atalii ona o tulaga na tulai mai ile faagaioia ole kamupani nonu aemaise ile faaaogāina o tupe na maua ile faatauina atu ole sua ole nonu.
