Ole suauu lea ua maua nei i Samoa, e gaosia mai fatu ma fugalaau o laau eseese (herbs) ae faaautu lava ile fatu ole Olive. Ua utufagu ma tufatufa atu i tagata e fia maua se toomaga mai ma‘i ole tino, aemaise o gasegse ua faafia ona saili fofo solo ai mo se mapusaga, peitai ua faamaonia nei le manuia talu ona faaaogā le suauu ua faaigoa ole Apostolic Wonder Oil.
E lei atoa se tolu masina talu ona ta‘ape le faguu i Upolu ma Savaii. Ua aumai ele ulugalii misionare mai Filipaina. Ole alii o Paul Sunday ole Aferika ma lona toalua ia Dearly ole tamaitai Filipaina.
Ile faamatalaga a Dearly, “ole suauu e o lua ma le malosiaga ole talitonuga faatuatua ole ma‘i ile mana o faamalologa ile suafa o Iesu Keriso.” Ina ua amata ona tulei le suauu ile taulaga, sa manaomia ele misionare ma lona faletua ni fesoasoani.
Ma o la faaaogāina ai tamaiti laiti faatau oloa solo ile taulaga. Sa o atu nei tamaiti laiti ma afisiga faguu i magaala ole taulaga i Apia ma ta‘u atu i tagata ole faguu e manuia ai soo se ma‘i. Peitai ua alua‘i alua‘i le faatauga faguu ale aulaiti lea, ua nonofo ma faatau le faguu ma lipoti ai ese tasi ile ulugalii misionare.
Ile tautinoga a Paul, ole faamoemoe na iai ina ia iloa e tagata le suauu ma ia maua foi sina alofa (donation) e fesoasoani ile aumaiga ole faguu mai Filipaina. Peitai na faagata ai lava i lena taimi e tusa ole ono vaiaso talu ai ona toe faaaogā tamaiti laiti e faia le galuega faalauiloa.
Toalima talavou ua totogi e faalauiloa le faguu I totonu ole lua masina talu ona taunuu faguu i Apia, ae ua faitau selau faguu taulia. “E iai le isi lala autu ole fagu suauu lenei i totonu o Filipaina, o iina oloo lafo mai ai tupe e totogi ai le aufaigaluega, o alii ma tamaitai talavou” ua manuia i alagatupe ona o lenei lava auaunaga. E $10tala ile fagu pe a ma le 30mililita.
Ile molimau a le alii talavou o Ryan Moors, ole vaiaso talu ai na malaga atu ai e faia le faalauiloa ole faguu i Savaii, ma e maeu foi le manaomia. Ole latou galuega, ole faalauiloa ma ua iai lava foi le latou taitai nate faia tatalo ole faamalologa. Ole tulaga foi lea na molimauina i nuu i tua o Upolu na oo atu iai le faalauiloa ale vaega talavou.
Ole tino ole fagu oloo tusi ai, e manuia ai ma‘i ole pa‘u, mageso, lala vevela, toto unooa ma manu‘a. E vave tele foi le tali atu ale faguu i tiga ole tino, toto maualuga, faaletonu ole fai‘ai, fatuga‘o, ate ma isi ma‘i.
Ua faatonuina foi e na ole faatolu lava ile aso ona milimili sina suauu ile vaega ole tino o aafia ma faia se tatalo ole faamalologa.
Molimau le tina talavou ia Ioana Misa, ua ola ile faguu
“Ole tele o taimi oute oi ai ma taoto e tiga, avatu ile falemai fai mai le fomai e leai se mai, na fofo a‘u ile toala, e tea lava ae lagona lava, ole ā se feau e fai, e lagona lava le tiga ole tua, ae o lo‘u manava a oso e mimigi mai i luga o‘u vae, pei ole a ou pipili.
“E iai le aso na ou alu ai i Apia, ae ou vaai o tufa pepa tamaiti ile taulaga, fai mai ole Master faguu. Na ou alu loa ile ofisa e maua ai le faguu, ma latou faia ai le tatalo faamalologa mo a‘u, e lua ituaiga o faguu, e aogā ile lafa, papala, ma isi ma‘i.”
“Oute alu lava ile aso lea i Apia o faaletonu lava la‘u faalogo. Na fai lo‘u tatalo faamalolo ma aumai la‘u faguu. Ole aso lava lena na ou lagona ai le suiga, ua mapu lo‘u tua ma lo‘u manava. Ae oute lei toe faatali ile aso na sosoo ai, sa ou toe alu lava ile tamaloa Aferika e ta‘u iai lo‘u manuia. E uu ai lo‘u tuaua, pe a fufusi mai la‘u faalogo.”
“Na ou ave foi le faguu faaaogā i lo‘u faatina, ona e iai le ma‘i tumau e maua ai, ma ua manuia ai foi ma vasa‘i mai le oso faalausosoo o lona ma‘ilili na iai.”
“Sa ma talanoa foi ma lo‘u toalua, oloo faigaluega i Ausetalia, ile itu tau fualaau ale malo, ma sa ma‘i foi ia, ma mana‘o mai ise faguu ina ua faamatala atu iai lo‘u manuia ai.”
“Ua tele tagata o lo‘u aiga ma a‘u uo, ua ou tala‘i faailoa atu iai le aogā ole faguu, ma ua faaaogā foi e latou, ona ole fia malolo lava. Ae ole mea tāua lava ole talitonu ile mana ole tatalo ma le faamalologa ile suafa o Iesu Keriso.”
Ole molimau ale faatina ua aogā foi iai le faguu, “na amata lo‘u ma‘i ile vaitaimi na faatoa maliu atu lava o lo‘u toalua.”
E maliu lo‘u toalua oute lei ma‘i faapea. Ae ole po ole Aso Toonai na ma o ai ma lo‘u uso ile poka sa fai i Palisi. Ae malama ane le taeao ole Aso Sa na sosoo ai, o‘u alu ile fale ae oso ai loa lo‘u ma‘i ma ou lē iloa ai se tagata.
O lo‘u manava ma lo‘u tua na ou logo ai lava, talu mai lava lena taimi. Ae ina ua sau Ioana ma le suauu e fofo ai a‘u, ua iloga ona tea le tiga o lo‘u tua, vaganā ai le manava oloo lagona le i.
Ua vasa‘i mai nei, ae ole mea na iai pe ta ‘i faalua ona oso ile vaiaso. Ou te leiloa le taimi e oso ai, oute leiloa foi le mea e tupu. Ae o faamatalaga mai ua o’u iloa ai. “
O lesi molimau, ole teineititi aoga I Vaimea na matua fiu e togafiti mageso o lana tama o lima ma vae, ua manuia ai nei.
I le talanoa a le tina talavou o Ioana Misa, ose fiafiaga ia te ia, le ta’uta’u atu o lenei faamanuiaga i isi tagata ole tatou atunuu o fia maua le fesoasoani.
Ua toe faaopoopoina ai nei le isi malosi o Ioana e faaauau ai lona faleaiga i luma ole faleoloa o Frankie i Vaitele, e faatau ai lana ulo vaisalo, kofe, sanuisi, koko araisa. “Oute faafetai ai ile Atua, ile faguu ua auala mai ai lo‘u malosi.”
