E maua le fāsefulu o suafa o alii ma tamaitai leoleo oloo umia tulaga faaleoleo faaofisa poo commissioner officers faapea leoleo oloo umia tulaga faaleoleo ile vaega ole pulega poo le Executive ale Matagaluega o leoleo, ua saini o latou aao ise tusi ua tuuina atu ile Minisita o Leoleo le afioga Sala Fata Pinati ua faailoa ai lo latou lē toe manaomia ole Komesina o Leoleo oloo faamalolo lē tumau le afioga Fuiavailili Egon Keil.
Ole tusi foi lea ua faaalia ai e ia leoleo sinia ua lē o toe iai so latou faatuatuaga ile alii Komesina poo le faauluuluga ole matagaluega. Ole vaiaso na tea nei e pei ona faaalia ese molimau faatuatuaina na ave ai lea tusi ma le sainigalima poo se petition ile Minisita. Ua faaalia foi ele molimau ua mae‘a ona tauaao atu ele minisita lea sainigalima tusitusia ile afioga ile Palemia, Susuga Tuilaepa Lupesoliai Sailele Malielegaoi.
I sailiiliga ale Samoa Times ua maua ai ole tusi ma le sainigalima ua ave ile Malo oloo faailoa ai ni tuua‘iga faasaga ile Komesina e aofia ai ma ni gaioiga solitulafono oloo aafia ai.
Ole soona fai ole pulega ale Komesina i tala ma upu e lafo i leoleo faapea ma ni solitulafono na aafia ai nisi o leoleo sa ia lē faia iai ni faaiuga ua faailoa uma ile tusi.
Oloo ta‘ua ai foi e pei ona faailoa mai ele molimau faatuatuaina ma le taunuuga ole suesuega na faia ile laau malosi ole AK-47 sa tatau ona faatama‘ia ae sa teu ile nofoaga oloo teu malu ai laau malosi a leoleo ma sa umia ele Komesina i taimi e faia ai ni osofaiga tau laau ma fualaau faasāina poo drug raids.
Oloo iai le talitonuga e lē o toe mamao ae faatino e leoleo tu ma aga masani ile faia oni moliaga.
Ole sainigalima ua tauaao nei ele taitai ole Malo oloo iai le talitonuga ole a tuuina atu i luma ole Kapeneta mo se latou finagalo ma se faaiuga. Peitai o moliaga ole Komesina o leoleo ua taoto nei ile faamasinoga ua faamoemoe ole aso 11 ole masina nei o Novema e fofogaina ai le talosaga ole soloia o moliaga e pei ona finauina ele Komesina ma lana loia.
O molimau tusitusia e lagolago ai le mau ale Komesina oloo aofia ai se Minisita ole Kapeneta ose tasi e iai ni ona sootaga faaleaiga ile alii Komesina o leoleo.
Ole mataupu foi lenei i moliaga faasaga ile Komesina ua mae‘a faila ai se molimau tusitusia ale Minisita o leoleo oloo ia teena ai le faia o sana faatonuga e faatino le osofaiga na taitai ele Komesina o leoleo lea na pueina ai le susuga Suitupe Misa ile maketi i Fugalei.
