O le Aso Sa ua mavae 19 o Aokuso na atoa iai le 76 tausaga o le soifua o le tamā matua ia Vaipua Noa Maugatai, ae le mafai ona galo ia te ia le lelei sa iai Samoa i la aso. Sa leai ni meaai tuu aisa, ae sa faalagolago aiga ia latou mea fafaga i lafu moa ma lafu puaa e tali ai malo aemaise o mea lelei e ina’i ai le saka.
O le manaia o la aso e le mafai ona e faalogo atu o oi mai mātua ma aiga i se tupe e faatau ai se meaai lelei. A siliga mai se meaai mai le sami i se i’a, ona tapa atu lea o le aiga i le lafu moa ma le lafu puaa. O le tele o aso e faasolosolo lelei le taui’a mai le sami pe a oo ina lelei le faiva. E masani ona saka ia vela i’a ona faapulou lelei lea mo le isi aso, auā sa leai ni pusa aisa sa maua.
E ala lava ona manaomia le tupe i la aso, o le tupe e faaaogā e faatau ai le suka, o le fasimoli poo le kalasini e ola ai le moli. Sa faigofie mea uma, e le lagona se oi i mea e fai, auā foi e fai o le manuia o faatoaga ao le manuai foi o faiva i le sami pe a oo ina alu se faiva. O le aufaifaatoaga foi i aso la, e lē mafai ona faatauina se maumaga i le maketi, ae na’o le toto lava ma aai.
E lei faigofie lona tauasaina o aoga, auā e savali mai lava i Samamea e agai atu i le aoga a le itumalo o Taelefaga, o loo iai le aoga e aoga ai, ina ua mae’a lana aoga tulagalua i Uafato. E alu ma lana ‘ulu maalili poo se esi i le aoga, ae o le galuega foi lea a ona mātua sa fai i lea vaitaimi o le afifi lelei o le meaai lea mo lana meaai i le malologa.
E taupepe i le ie aoga e tasi ma le ofu aoga e tasi, ae a palapala ona ave lea ua nuti i le paipa ae aumai faala, a oo la ua mago ona gaugau lea ae tuu i lalo o le aluga ina ia tau maua se mafolafola e ofu ai i le isi aso e sosoo ai. E moni sa iai auli malala ae sa faapelepele lava e le tina ne’i te’i ua leaga ae lē aulia ofu o le Aso Sa.
Na faaauau mai ana aoga i le aoga a Malua Fou, seia oo lava ina maua lana galuega i le faatau oloa ia Molesi i Apia i le lima tausaga. O iina sa galue ai loa ma ave ana vasega i uta i Vaivase i le matata eseese i le palama, ma sa maua ai ana tusipasi. O ana tusipasi ia sa mafai ona toe saili ai le isi ana galuega lea sa faigaluega ai loa i le Esetete Tausi i le sefululima tausaga i lona vaaia lea o le aufaigaluega e toasefuluono i le vaega o le palama. Na maua galuega ae sa lē maua ai ni tupe tetele poo ni totogi maualuluga, ae sa vaaia lava le fiafia ma le ola finafinau i lea vaitaimi.
O le tausaga e 1974 na sau ai e tafao i Niu Sila nei, ma malolo mai ai i galuega, ae peitai na suia lagona ma le fia nofo i Niu Sila ina ua taunuu mai ma vaai o le lumanai lea o lona toalua ma lana fanau. Na toe foi i Samoa ma toe fuafua mai loa le malaga ma le aiga, ma sa faataunuuina lava lea manaoga. Na toe malaga mai ma lona atalii matua i Niu Sila, ma taumafai ai pepa a lona atalii ina ia mafai ona apalai uma ai latou pepa ma le tina ma isi o le fanau, ae o le vaitaimi na o le faigofie o le faiga o pepa. I le faasolo mai o le suiga o le olaga ma ua faasolosolo ai foi ma tausaga ua foaiina e le Atua i lona soifua ma ua ia maitauina ai le tele o le suiga ua iai lenei vaitau, e fai o le taugata o le soifuaga ae o le tele foi o mea ua faafaigata ona agai iai le malo i ana polokalame, ua oo foi lava i Samoa.
Pau le agaga faafetai i lona loto i le Atua ua tele nei tausaga ua foai i lona soifua. Na te faafetai ai foi i le tausiga a lana fanau ia te ia ona o lea ua tele nei tausaga ua ia maua. Ua tele tupe ma le tamaoaiga ua maua i lenei vaitaimi ae lē tutusa ai ma le fiafia sa iai aso ua mavae. O le faamanatuina o lona aso soifua na faamanatuina lava i lona maota i Magele faatasi ma lana fanau.
