Aiga fou ia Keriso, Lesa Gary Lauese Ainofo ma Tinei Elizabeth Matafai Leniu

Aiga fou ia Keriso, Lesa Gary Lauese Ainofo ma Tinei Elizabeth Matafai Leniu

O le ioe leotele o le alii o Gary Lauese i le taimi o lana tautinoga ua avea Tinei Elizabeth Matafai ma ana manamea, na molimauina ai e aiga na lua faapea uo ma ē masani ua tino e tasi i laua i le alofa e ala i le sauniga o le faaipoipoga.

O le ioe foi o le tamaitai ia Tinei Elizabeth Matafai e avea Lesa Gary Lauese Ainofo ma ana tane faaipoipo ua atili ai ona faamausali i loto ma agaga o le auvalaaulia ua nanau le loto o le tamaitai i le alii ma ua faavae foi le aiga fou i le papa mautu o Iesu Keriso lea. Ua lē o toe eseese i laua ae ua tino e tasi ma aiga e tasi ina ua faapaiaina i luma o le Atua. O le alofa o le autu lea na tata’i iai e le ta’ita’i o le sauniga ia Rev Masunu Utumapu lagona o le ulugalii fou ina ia fai ma taiala i le amataga o le aiga. O le faavae foi lea e ao ona savavali ai le aiga i taimi uma ma aso uma o le olaga. Ia iloa ona alofa le tasi i le tasi, ia alofa i mātua ma aiga ae sili ai ona alolofa i le Atua ma lana galuega.

O i laua o se fanau o loo faaaogāina i le galuega a le Atua i totonu o ekalesia sa galulue ai, ma ia tatau ona aveaveai ai pea lea tiute ma lea matafaioi o le galulue mo le Alii. O le ta’ita’i aoao o le Assembly of God ia Rev Iliafi Esera na saunia le tatalo e faapaia ai i laua. O le molimau ola i le aso faapitoa o le ulugalii fou, o susuga i faafeagaiga ma o latou faletua mai ekalesia eseese, aemaise ai o uo ma ē masani faapea aiga na lua. O se sauniga mamalu ma le matagofie a’o laulaututu faatasi tagata uma e momoli le aiga fou a le fanau i luma o le Atua e ala i lea sauniga. O le malumalu o le Ekalesia Metotisi i Grey Lynn sa faataunuuina ai lea faamoemoe. Ua faailoa le titi faitama o mātua ia Rev Selota Ainofo ma le faletua ia Lina Ainofo, ae faapea foi ia Bond Tagaloa Leniu ma Teeva Matafai, i le felanulanuai ma le matagofie o tapenaga o le aso o le fanau. Na auai mai ai foi le Sa’o o le aiga o le susuga i le faafeagaiga ia Rev Selota Ainofo mai Samoa le susuga ia Anapu ma ua matagofie ma maualuga ai le faamoemoe.  Na faaauau polokalame o le aso o le ulugalii fou i le hall a le ekalesia VOC i Magele i le taumafataga faapea ma faafiafiaga. O le tofa ia Seumanu Simon Matafai sa fai ma fofoga o le aso ae o le tofa ia Olamaleva Fou sa tu tootoo i le taimi o faaaloaloga. E silia i le limaselau le mamalu o le auvalaaulia sa molimauina le tuufaatasia o Lesa Gary Lauese Ainofo ma Tinei Elizabeth Matafai Leniu.

I molimau a mātua na talatala ai i olaga lelei o nei fanau i totonu o aiga aemaise ai o ekalesia sa galulue ma lolotu ai. Ma o le latou lava lea naunautaiga ia faaauau pea o laua tiute i totonu o ekalesia, faatasi ai ma a latou faamanuiaga ma alofaaga molipo i le aiga fou.

Na momoli mai foi alofaga ma faamanuiaga mai o laua aiga mai Ausetalia, Samoa ma Niu Sila nei ia i latou sa lē mafai na lava mai ae sa lafo mai a latou faamanuiaga tusitusia i luga o cards ma upega tafailagi. Sa faapea foi ona momoli alofaaga a o laua mātua ma aiga aemaise o laua ekalesia i le amataina o le aiga. Ia manuia le aiga fou Lesa Gary Ainofo ma Tinei Elizabeth Matafai Leniu, ma ia fua tele le niu. Ia faavae mea uma ia Iesu Keriso le papa mautu o le aiga.