E tele mea o le galuega a le Atua o loo manatuaina e le susuga i le faafeagaiga ia Rev Selau Loli Teufilo mai le afioaga o Vaipua ma Salelavalu ma lona faletua ia Fogalele Selau Loli mai le nuu o Fagafau ma Faleasiu. E ui ua leva ona malolo manumalo mai i le galuega a le Atua, ae o loo vaaia lava le agalelei o le Alii i lo laua soifua galulue ma lo laua soifua tautua i le Atua ma lona finagalo.
Ua 90 tausaga o le soifua o le susuga i le faafeagaiga malolo manumalo ae o loo ia manatuaina lava le aoga sa ia aoga ai i totonu o le kolisi o Uesiliana, ina ua mae’a mai lana aoga i le aoga tulagalua totonu o Salelavalu. Na toe foi mai ma aoga i Faleula i le tolu tausaga ma sue loa i le kolisi faafaifeau i Piula ma faamanuiaina ai lana taumafai.
O le tele o tausaga o le laua galuega o totonu lava i le ofisa i Faleula, seia oo lava ina tofia e tausinuu mo ekalesia.
O le lagona o le tamā faifeau malolo manumalo e manaia lava le galuega a le Atua sa galulue ai.
I le ola faitaulaga foi o tagata lolotu sa iai i lea vaitaimi sa laua vaaia lava le ola faitaulaga fiafia o tagata ma tausi le auauna a le Atua. O aso la e iai aiga sa tasi le tagata faigaluega, ae o isi aiga lolotu e leai ni tagata faigaluega ae fiafia lava tagata ma fai atu peleti a le faifeau, a’o tupe pauni le tupe Samoa sa iai.
E moni lava e iai peleti ae e iai foi taimi e toe agai mai ai aiga o le ekalesia ma toe aitalafu atu tupe i le faifeau, ia sa lē tuua lava se mea ona o le alolofa i tagata lolotu ma le galuega a le Atua. E leai se mea na faaletonu i la aso i totonu o le galuega e fai mea fiafia tagata uma.
O isi faafitauli sa iai i totonu o le galuega o le tulaga i vai a’o tausinuu ai i Utuloa i Asau sa faaletonu lava le suavai, ae tau saili se vai e taeele ai auā na’o le sami e iai ae mai e le mafai ona taeele ai tagata. Sa tele ina tau faatali le vai i le timu e faaaogā, ae o le numera tasi lea vaitaimi o meaai a aiga.
E tau leai ni meaai faatau ae sa tele ina saili tagata i le sami e fagogota ma le vao i le atinaeina o faatoaga ma maua ai meaai. E iai taimi e o ai foi laua e galulue ma momono fasi ufi i vai maa e ola ai lava latou. E ese le faigofie o mea i la aso e leai ma se mea e faaletonu, e tele meaai i le eleele. O le faletua ia Fogalele Selau Loli ua 80 tausaga o lona soifua, na ia molimau e faapea, e ese ma le manaia o le latou mafutaga ma nuu ma ekalesia sa galulue, e leai ni faafitauli sa tulai mai i le galuega e ola fiafia tagata uma.
O le taumafaiga o aoga a le fanau e maua lava meaai maalili i le po e pei o talo, taamu, fa’i ma ‘ulu e toe tuu faalelei ona faavevela lea e toe omai tamaiti aoga toe aai ai.
O le tina malolo manumalo na aoga i le aoga tulagalua i Faleasiu ona faaauau lea o ana aoga i le aoga a le Aso Fitu. Na mae’a ana aoga ona nofo loa le e fai le fatu aiga tausi. I le saunoaga a le tina ua telē le suiga o nei aso ma aso la, e sili atu ona matagofie mea i aso la nai lo nei taimi. E ola fiafia ma taugofie le soifuaga ae o le taimi nei o lea ua maua ma lelei le tele o galuega ae o lea foi ua taugata ai ma le soifuaga.
E lē o mafai ona manatuaina e le tamā le tausaga na amata ulufale ai i totonu o Piula, ae o le tina o loo manatua e fa tausaga sa iai i le kolisi ona see mai loa lea ma nonofo i Faleula. O le tausaga e 1959 o le laua uluai ekalesia lea na tofia e tausi o Utuloa i Asau, ona sosoo lea ma Faleula, na toe tofia i Afega e faaauau ai le galuega, ona toe foi loa lea i Faleula.
Na toe filifilia i le ekalesia i Faleagai i Sataoa ma malolo mai ai loa ina ua gasegase le tina ia Fogalele. Na toe maua tofiga mai le ekalesia ma toe galulue ai i Faleula, ma faaiu ai loa le laua tautua i le galuega faifeau i le nuu o Saleaula, lea ua malolo manumalo mai ai i le tausaga 1999.
Na soifua mai le susuga i le faafeagaiga ia Rev Selau Loli i le aso 15 o Aokuso 1928 ae na atoa lona 90 tausaga i le aso 15 o Aokuso 2018. O le tina ia Fogalele na soifua mai i le aso 6 o Ianuari 1938 ae na atoa lona 80 tausaga i le aso 6 o Ianuari i le 2018. E toafitu o laua alo o Loli Faafetai, Faamanu, Loli Mesepa, Falealuga, Talagafa, Afega ma Selau.
Ua iai foi nisi o laua alo o lea ua latou faaauauina le galuega faafaifeau a mātua i totonu o le galuega a le Atua.
O le Aso Toonai na faamanatu faatasi ai aso soifua o nei mātua faaleagaga malolo manumalo, i le maota o Samoa i Magele, ma sa tumutumu ai aiga ma fanau na malaga mai Samoa, Ausetalia ma Niu Sila, ae faapea foi i uo ma ē masani aemaise o le laua ekalesia Metotisi i Magele o loo galulue ai i le taimi nei.
O le susuga i le Sea o le sinoti i Saute ia Oianatai Matale na momolia le taulaga o le faafetai ma le viiga o le Atua ona o lenei aso taupoina ua mafai ona aofaga fiafia ai tagata uma e molimauina le lelei o le Alii i le soifua tautua o nei mātua i le Atua. E ui ina poia i gasegase o le tino ae lē mafai ona mu itiiti ai le vavae o le fia tautua pea i le Atua.
O le susuga i le faafeagaiga ia Rev Tulaga Iosefa sa fai ma fofoga o le aso ae o le susuga ia Loli Selau Afualo sa fai ma sui o le aiga e momoli le agaga faafetai i le paia o le aufaigaluega a le Atua sa auai faapea Samoa potopoto, ma o ia foi sa gafa ma faaaloaloga i le paia o aiga.
E tele faafiafiaga ma molimau sa momoli ai le agaga fiafia o fanau ma aiga i le faamanuiaina o aso soifua o mātua. E malolo manumalo lava i laua ae o loo faaauau pea le laua tautua i le Atua i totonu o le ekalesia Metotisi i Magele.
