O le po o le Aso Tofi o le vaiaso ua tea i le maota o le Mangere Community Law Centre i Magele sa faia ai le sailiga tofi poo ai o le autalavou o le a avea ma sui faipule o le itumalo o Magele pe a oo ona tauaofia le Palemene a le Autalavou poo le Youth Parliament i le masina o Iulai 2013 i Ueligitone.
Ou te fiafia lava e faailoa atu o le tamaitai o Faaiu Anae-Tunai mai le Kolisi o Southern Cross i Magele lava, na filifilia e le komiti faapitoa sa nafa ma le filifiliga o se tasi o le autalavou mai alii ma tamaitai e to‘a sefululua lea na talosagaina a‘u e fia avea ma sui faipule o le autalavou mo Magele.
Na filifilia Faaiu Anae-Tunai e le Komiti faapitoa ina ua mae‘a le iloiloga o tusi talosaga na tusia e sui nei e 12, faapea ma le faafofoga o le Komiti i lauga sa faia e sui tauva, faatasi ma le lagolagosua o fautuaga sa tusia e mātua ma fanau sa iai i lea lava po.
O le auala foi lea e fai ai le filifiliga o sui a le Leipa pe a oo i le filifiliga o sui tauva a le Leipa i taimi o faiga palota mo le Palemene faapea foi sui tauva mo faigamalo laiti e pei o le Auckland Council lea o loo fuafuaina mo le faaiuga o lenei tausaga.
E ui ua manumalo ma sili le tamaitai o Faaiu Anae-Tunai i le tauvaga, a o isi sui sa manatu le Komiti faapitoa e ao ona amanaia i lea lava po o filifiliga, o le tamaitai o Julia Lui mai le aoga o McCauley High School na maua le tulagalua, ma le alii o Darius Apulu mai le Kolisi o De La Salle na ave i ai le tulaga tolu.
Ona ua na o Faaiu o loo maua lona pasese mai le Malo, o lea ua talia ai e le Mangere Rotary Club la‘u talosaga e fesoasoani i le pasese o Julia Lui (le tulagalua o le tauvaga i Magele) ina ia mafai ona malaga faatasi ma Faaiu i Ueligitone ma avea ma soa a Faaiu i le taimi o le Palemene a le Autalavou.
O lea o loo sailiili pea iai se isi e fesoasoani mai pe maua se pasese o Darius Apulu e malaga ai foi i Ueligitone ma lagolago ia Faaiu, ma maua ai foi e Julia ma Darius le avanoa e vaai ai i taualumaga o le Palemene.
E moni o le manumalo a Faaiu Anae-Tunai e fai ma sui faipule a le autalavou i Magele ona ua sili atu lava le lelei o lana lauga ma ana tapega, ae o le upu moni foi e ese le maoae uma o sauniga ma tapenaga ma lauga uma o sui e sefululua lea sa tauva mo lea tofi.
Ou te lagona ai lava le fiafia ma le mautinoa ia te au o soo se isi lava o latou nei sa tauva e mafai ona sui tulaga ia te au i se taimi o i lumanai. Sa lelei uma a latou lauga, lelei mataupu sa latou lāgā, lelei foi le momoliga o a latou lauga.
O lea la ua ave i ai la‘u lu‘i ia i latou nei e faapea – afai lava ua mananao i le tofi faipule o Magele, o le taimi lava lenei e sauni lelei ai ia iu lelei aoga, ia maua so latou faailoga poo se matata faapitoa, ma ia o faatasi le saili o aoaoga ma galuega ma le auai foi i vaega polokiki.
O le a ou faasino ia i latou nei auala o feuiaiga o polokiki i le vaega faaupufai a le Leipa i Niu Sila. O le a ou fesoasoani foi i soo se isi o latou e faapea mai ia te au e fia auai i faiga polokiki a Niu Sila.
Ou te talitonu ma le mautinoa i la‘u lava vaai ma la‘u faalogo i faiga lauga a sui e sefululua i lea lava po, e mafai e soo se isi o latou ona avea ma pulenuu o Aukilani poo le Palemia foi o Niu Sila, pe afai lava e naunau i ai. O le mafuaaga foi lea ou te naunau ai ia o faatasi le taumafai o nei tamaiti ia latou aoga ma le auai i polokiki. Ia i‘u mai a latou aoga ma le manuia, ae ua malamalama foi i feuiaiga o polokiki i Niu Sila, ma ua masani foi i galuega faapolokiki, ma masani i tagata e mafai ona fesoasoani atu ia i latou.
I la‘u faalogo i lauga a le autalavou i lea po, e lē gata i le malamalama o tamaiti i mataupu o loo aafia ai o tatou aiga i Magele, ae ua faailoa mai foi e tamaiti o loo tumau pea o latou agaga i le tāua o aoaoga a o latou mātua i mataupu faaleagaga.
O loo manaomia tele i le palemene a Niu Sila tagata e le gata o le atamai, ae ia lava le faatuatua, lava le faautauta, lava foi le mata‘u i le Atua. E tāua nei mea ona o le faigata o mataupu e nafa ma le Palemene, ae ua tele foi fesuiaiga ua iai i Niu Sila.
O tamaiti uma nei sa tauva mo le tofi faipule o le autalavou a Magele, ua ou valaaulia nei e o mai e faavae se Palemene a le autalavou i Magele. Ia avea latou e lagolagosua i galuega a Faaiu Anae-Tunai ma galulue faatasi ina ia iai se leo o le autalavou i mataupu polokiki i lenei itumalo.
O le tāua o le iai o se leo o le autalavou a le Pasefika, aemaise se isi e malamalama i lana gagana ma le aganuu, ia aua ai ne‘i mulimulitai outou alo ma tatou fanau i le leo o tupulaga papalagi, auā e ese le leo a papalagi, e ese o latou talitonuga, ese foi mea e tāua ia i latou.
O tatou tamaiti e tatau lava ona ese so latou leo mai tamaiti papalagi. E tatau ona faatāua i o outou alo ma tatou fanau, mataupu faavae na sau ai le olaga o le tagata Samoa lava ia e pei: O le ala i le pule o le tautua.
