O ni alii leoleo mai i Amerika o loo nafa ma le vaaiga o ogasami o le Malo Tele ma ona teritori, atoa ai ma sui o Fela‘uaiga a le Malo o Ausetalia sa iai i Samoa i le vaiaso ua tuanai auā le faatautaia o ni aoaoga e fesoasoani ai i le vaega o puipuiga o Samoa, i le puipuiga o ona tuaoi.
E to‘a 39 sui o Samoa i le Matagaluega o leoleo, le Pulega o Tali o faalavelave faafuasei lea e aofia ai le tineimū, o sui o le Matagaluega o Galuega ma le aufaigaluega o le Kamupani o Vaa faapea ai le pulega o uafu ma taulaga, na auai uma i lenei aoaoga tāua.
O le taimi lenei o le puipuiga o le gataifale o atunuu i tuaoi o Samoa ua aofia ai le vaega lea o leoleo o le sami a Amerika le US Coast Guard atoa ai Leoleo o Niu Sila faapea ai ma Ausetalia, ma o se galuega ua fai faatasi ma Samoa atoa ai tuaoi e pei o Amerika Samoa ma isi atumotu.
O le faaaliga a le sui o le Ofisa o Amerika i Samoa, le susuga Chad Berbert, o le aoaoga lenei ua faamalosia ai le va galulue faatasi o leoleo o atunuu e pei ona ta‘ua ma e lei mamao atu se galuega na tāpā ai lea va galulue faatasi ma mafua ai lava le manatu e tatau ona lelei atoatoa le tali atu a leoleo o Samoa i le tulai mai o ni faafitauli poo ni solitulafono i ogasami o le atunuu aemaise o le tutū faatasi o ona matagaluega ma ofisa e fesootai uma ma lenei galuega ina ia puipui malosi le sao mai o oloa e lē faatagaina i totonu o le atunuu.
E talafeauga le faatautaia o lenei aoaoga ma le pisapisaō ai o suesuega o fai nei i le uta o fagu uisiki ia na faatau atu i le atunuu ae faatoa iloa mulimuli ua tatala i tua lea uta tele ae e lei faatagaina faaletulafono. E leai se pemita e aumai ai ia oloa mai i Ausetalia ma o loo faagasolo ai suesuega o lea mataupu ua tuua‘ia ai faipisinisi, o se sui faipule o le Palemene, lea e matuā tetee i nei tuua‘iga, atoa ai ni tagata o le ofisa o le Tiute.
E lei molia se tasi i lea mataupu ae na ta‘ua e leoleo ua iai nisi ua masalomia ma o loo mulimulitai i ai suesuega.
