(Alternative dispute resolution)
Na ou faamamafaina i le vaiaso na tea nei le taumafai o tatou Samoa, aemaise lava tatou mātua na ola mai i Samoa, le faaaogā o auala na tatou masani mai ai, e foia ai faafitauli i totonu o aiga ma faalapotopotoga, e iai lotu, a o lei aveina mataupu i ni fale faamasino.
E tusa foi lava po ua oo mataupu i le fale faamasino, e mafai lava ona taumafai e faalelei ma maua se iuga e fiafia i ai itu e lua, ona toe tatala mai lea i tua o tagi ua oo i totonu o fale faamasino.
Manatua, o mataupu e ave i fale faamasino, e iai le itu e malo, e iai le itu e faia‘ina. O le faaiuga e fai mai e le faamasino. O le itu e lē malilie i le faaiuga, e pau lava le mea e latou te faia, o le ave o le apili i le fale faamasino maualuga. O nei apili e toe alu ai isi tupe ma taimi, ae leai se guarantee poo se faamautinoaga e faapea o le a malo.
Mediation; Judicial Settlement Conference:
E mafai ona fai e outou o loo afaina se talanoaga i le tou lava va, a maua se maliega, ona tusia lea i lalo o lea maliega, ae siani lima ai itu e lua, ma tusia ma le aso na maua ai le maliega, ona tofu lea o itu e lua ma kopi o le maliega.
Afai o se mataupu ua i totonu o le fale faamasino, e mafai lava i itu e lua ma a latou loia ona taatia le mataupu i le fale faamasino, ae taumafai e sue se auala e foia ai le faafitauli, e faaaogā ai le Mediation. E iai loia e mafai ona fesoasoani i taumafaiga faapea. O le tagata na te tauaveina le tiute e taumafai e aumai faatasi itu e lua i se maliega, e ta‘u o le Mediator. O le Mediator o le tagata lea e malilie i ai itu e lua, ma e totogi foi e itu e lua le pili a le Mediator.
A manuia le mediation ma maua se maliega, e tatau lava ona tusia i lalo le maliega, ma sainilima i latou na malilie, ma tusi le aso na malilie ai. Ave kopi o le maliega i itu e lua.
Afai ae lē manuia le mediation, ona faila pea lea o se tagi i le fale faamasino, ma fai loa i lau loia, e talosaga se ‘settlement conference’. O le settlement conference e taitai lea e se faamasino ina ia sue se auala e foia ai le faafitauli lea e i totonu o le tagi ua faila i le fale faamasino. A fai Judicial settlement conference, e talanoa itu e lua, ae fesoasoani le faamasino i itu e lua i ni auala e taumafai e sue ai se faaiuga. O lona uiga e taitai e se faamasino talanoaga a itu e lua (itu tagi ma le itu tetee). O le faamasino e lē o tu i le tulaga faifaamasinoga, ae e tu le faamasino i se tulaga e sue faatasi e ia ma tagata nei i ona luma, se auala e foia ai le faafitauli.
Se‘i vagana ua lē mafai i le mediation poo se ‘settlement conference’ ona foia le faafitauli, ona faato‘ā fai loa lea o timetable e le fale faamasino, e faatapulaa ai le faauauina le tagi lea ua i luma o le Court, ma faaoo loa ona fai le faamasinoga.
O aogā nei o le taumafai e foia faafitauli i auala ia e ta‘ua:
A talanoaina se mataupu, e fofola ai e le isi itu i luma o le isi itu mea e lē o fiafia ai, ma le ala o le lē fiafia. E fai lea ma auala e aveese ai le ita ma le lē fiafia, ma e maua vave ai foi le loto faamagalo i le va o i latou sa femisaa‘i.
A talanoaina se mataupu e faafesagai latou sa taua‘imisa. O le avanoa lea e faalogo ai i se mea o i le loto o le isi ma malamalama ai i le mea na ala ai ona mafua se femisaa‘iga. A malamalama, e iai iinā le avanoa o le faamagalo, ma talanoaina se auala e aua ai ne‘i toe tupu mai se faafitauli faapei o le mea na tupu, i se taimi o i luma.
E vave ona maua se iuga e foia ai misa ma fevaevaeaiga. E vave ona togafiti ma foia ai ni faafitauli a o lei oo i nisi tulaga faigata e pei o le toto masaa, poo le faaoolima ona o le ita. E maua le soifua maloloina lelei i le ola fiafia.
E taugofie atu i lo le faaauauina o mataupu i le Court.
O faaiuga pe a uma ona soalaupule, o faaiuga e faavae i luga o maliliega a itu e lua. E lē o ni faaiuga e faia e se faamasino.
E maua le loto fuatiaifo ma lagona faamagalo pe a faafesagai i latou o afaina finagalo i se mea na tupu – auā o la ua faafesagai ma faalogo le isi i le tasi; faapea foi ona faaali mea o teuloto.
O fale faamasino:
Taugata tele le ave o mataupu i le fale faamasino, ae se‘i vagana ua leai lave se isi auala, ona ave lea i le fale faamasino – Court. E tuai ona fai mai se faaiuga ona e pisi tele fale faamasino. E te faatali mo le taimi e valaau ai le mataupu e faatapulaa mai e le fale faamasino. E fai e se tagata ese le iuga, e afaina ai lou olaga ma le olaga o le tagata lea sa lua eseese.
E tusa poo le ā le lelei o le tapenaga a lau loia, e lē o oe ma lau loia e faia le faaiuga. O faaiuga e fai e faamasino. E tusa lava poo se faaiuga e te lē fiafia i ai, e fai mai loa le faaiuga, o le faaiuga lena e te nofo ma oe, se‘i vagana ua e apili ma e malo i le apili.
E iai lau aiātatau e ave sa‘o ai lau tagi i le faamasinoga, ae tāua le faaaogā o auala ia e ta‘ua i luga, ona e iai mea lelei e maua ai mo le va o aiga poo tagata lotu i totonu o se Ekalesia.
