Tusanilefaiaao Faaolofala Faatigaloto Reti Simanu
Sa galue i le Ofisa o Faatoaga ma mulimuli ai tautua i le Matagaluega o Faamasinoga o se tasi o Faamasino o le Faamasinoga o Fanua ma Suafa.
O ia foi na faavaeina ma nisi o matai o le afioaga o Savaia i Lefaga le Talomua na amata ai ona toe vaaia le faaolaola mai e le Malo ma isi itumalo i Samoa o lenei faiga, e toe lalaga ai le agai o afioaga i faatoaga ma faasao o le gataifale auā le tausiga o aiga aemaise o le saili ai o seleni mo le tausiga o aiga.
O ā lava faatasiga a Savaia e faatautaia ma molimauina e le atunuu, e lē mafai lava ona faatautaia e aunoa ma le molimauina ai o lenei tamā. O se matai e tu malosi i le atinae o le lotu EFKS i lea afioaga ma o se tasi o Faamasino ua leva lana tautua i lea Matagaluega tāua a le Malo.
O le toe tuufaatasia la o le anoano na agai atu e faamavae i lenei tamā ina ua amia ma faamānavaina e le Atua ana galuega, na manino ai le tele o tiute o lenei tamalii aemaise o lona loto ua maliu lava o taulai i lona afioaga ma lana Ekalesia. E tele ma anoanoai molimau na fofogaina le talaaga o le soifua auauna o Tusanilefaiaao Faaolofala Faatigaloto Reti Simanu, ae o le molimau a lana fanau, e ui i le tele o le taimi o lenei tamā i le atinae o lona nuu, le galuega faafaiaoga, le atinae o faatoaga ma faasao o le gataifale aemaise ona tiute faa-Faamasino, ae o le lelei o aoaoga le faamuamua lava e molimau ai ona alo i totonu o lo latou lava aiga. Ona pau lea o le taimi e vaaia ai le malosi o le leo o lo latou tamā aemaise o le mau luitau na ia tuu atu ina ia mautinoa e lē ola falolo lana fanau ma ia maua le saolotoga o le tagata e atiae ai lona olaga – ona pau lava le auala e faatino ai e pei ona molimau le fanau o le lelei o aoaoga. Faaalia e lea lava molimau, e mimita tele le toeaina pe a manuia ma faaeaea fanau a Savaia i soo se tulaga tau i aoaoga ma atinae, ma o le faigata o le ola a‘e i Apia a o nofo aoga ai e lē mafai ona tuua i talasua aemaise o tala e unai ai faataitaiga lelei i totonu o lo latou aiga. O lona naunau i le faaleleia o le aganuu i auala e pei o faafiafiaga na molimauina ai lava le taitaiga o le Aufaafiafia a Faiaoga o le atunuu.
O le aotelega o le soifua o Tusani e pei ona silafia ai e le toatele na amata i le aoga tulagalua i Saleimoa, sosoo ai le aoga tulagalua a Savaia i Lefaga.
Na aoaoina foi i le Aoga o Faatoaga a le Kolisi o Avele a o lei faaauau atu i le Aoga faa-Faiaoga i Malifa ma le Iunivesite o Macquarie i Sini Ausetalia.
O lona foi mai na galue ai loa i le Matagaluega o Faatoaga sosoo ai ma le Ofisa o Aoga e pei ona galue ai faafaiaoga, Pule Aoga, Asiasi Aoga.
O le matagaluega o Faamasinoga na mulia‘i i ai lana tautua faa tagata faigaluega a le Malo e pei ona tofia ai o se faamasino o le Faamasinoga o Fanua ma Suafa. Sa faapea foi ona oo le laasaga o lea auaunaga i le tofia o ‘Tusani’ o se Sui Peresetene o le Faamasinoga lea.
O lona soifua auauna i le ekalesia sa pele ia te ia, na amata lava i lona faavaeina o le Autalavou a le EFKS a Falefa. Sa taitai pese foi i le aufaipese a le EFKS i Falefa. Sa galue o se tiakono i le EFKS i Savaia ma na faapea foi ona avea ma Taitaifono a le Ekalesia lava lea. Faaalia e lana fanau le malosi o le sao o lo latou tamā i le tulaga ua iai a latou foi taumafaiga faale aoaoga, aemaise le atinae o le tagata lava ia ma lona aiga.
O le tina o le aiga o Tupito Mau Moananu ma le to‘a 13 o o la alo, e to‘a 15 o loo ua tuua nei i le aiga, ma o le mau a le fanau, le aiga, le afioaga, lana ekalesia ma sui o le Malo na faapea ona molimauina ona toe sauniga, o se tasi lenei o taitai o le a faagalo gata i ona uiga tausaafia ma le alofa, aemaise o le faamalosi i soo se tasi e manatu ua moomia lana fesoasoani.
