I talosaga ua faapea ona tali mai ai le Malo o Ausetalia i faalapotopotoga eseese i totonu o Samoa, o le talosaga a le aoga laititi a le afioaga o Salelavalu i Savaii, na ese mai lava i le tele o fanoga a ia faalapotopotoga.
O le talosaga a le aoga a Salelavalu, e mo le faaleleia o le fola o le faleaoga.
O le mafuaaga, ua toatele fanau a le aoga ua aafia i faama‘i o le pa‘u ona o le pefu poo le palapalā o le fola o le faleaoga. O le toatele o fanau o loo faaaogā le fola o le fale e saofafai ai i taimi o aoga.
O loo iai fala e ufiufi ai le sima peitai ua matauina e le aoga e toatele lava fanau na aafia ai tino ona o le palapalā lea. Sa iu lava foi ina agai ese ai nisi o fanau sa aooga ai i lea nofoaga ma faapea ai loa ona saili le aoga ina ia iai se isi laasaga i le faaleleia o le faleaoga mo fanau aoga.
O le tali na sau i le Ofisa o Ausetalia i Samoa nei, lea ua fola atoa ai le faleaoga i tiles na faatau i lea fesoasoani.
O le faaiuga la o le vaiaso na malaga lelei ai lava le Hai Komesina o le Malo o Ausetalia i Samoa, le Susuga Dr Stephen Henningham i Salelavalu, e molimauina le galuega ua mae‘a nei ona faatino i le faleaoga atoa.
E $30,000 (tala Samoa) le aofai o le tupe na faaalu i lea galuega ua aofia uma ai potu aoga o le faleaoga o Salelavalu.
O lana saunoaga ina ua mae‘a asia lea galuega – soo se auala lava e mafai ona fesoasoani ai lona malo i le faaleleia o le itu tau i aoaoga i Samoa, o le a taumafai e tali atu i ai aemaise pe a vaaia le itu lea e siisii ai le ola aoaoina o le tama ma le teine aoga ma ua mafai ai foi ona ogatasi ma le faaleleia o le soifua maloloina o le fanau.
O le polokalame lenei e ta‘ua o Fesoasoani mo faalapotopotoga tumaoti, na faavae e le Malo o Ausetaia, le Iuni a Europa faapea ai le Malo o Samoa, e ofo atu ai fesoasoani laiti i soo se faalapotopotoga lava i tua i afioaga eseese o Samoa.
O le autū ina ia mafai ai ona iai se isi fesoasoani e ofo atu ia i latou e lē o maua ia ituaiga fesoasoani i fesootaiga masani o atinae i totonu o le atunuu.
Ua lua tausaga o lenei fesoasoani ma ua tele faalapotopotoga ua maua ai le faamāmā avega auā atinae i totonu o aoga, komiti tumamā, autalavou, polokalame a afioaga atoa ai isi faalaptopooga tumaoti.