Maimau o le olaga pe ana o se olaga e tumau pea. Ui i lea, o loo manino mai le Tusi Paia e lē mo tatou lenei olaga.
O lenei foi olaga ua na o se nofoaga e tapena ai le tagata mo lona nofoaga tumau, o le lagi lea ma le ola e faavavau e pei ona aoao mai le Tusi Paia.
Na pau le itu e misia ai lenei olaga ona o mafutaga mafanafana. A oo ina oo mai le valaau a le maliu ma le oti, ona lagona lea o le leo i Rama. E tiga le alofa ma pelega o mafutaga ma aiga, o uo mamae ma ē pele i lenei soifuaga o loo tatou aumau ai.
O le po o le Aso Faraile na agiga mai ai le tala faavauvau e pei ona salalau atu ma logo ai itu e fia o Niu Sila.
O le tala faamomoiloto i le toatele o i latou e silafia lelei ma lava le masaniga ma le afioga Muliagatele Sala Sally Newsham, o se auauna sa galue i le tele o tausaga e pei ona lauiloa ai i ona foi agavaa, peitai ua valaau i ai le Atua.
O le afioga Muliagatele o ia o se tasi o toa sa tausolomua i le finauina o avanoa auā le faatutuina o ni leitio Samoa e pei ona sa galue ai i le alaleo a le 531PI i le tele o tausaga ua tuanai.
O ia sa avea ma faauluuluga o le leitio i le itu Samoa i le faiga o polokalame ma le faasoasoaina o le aufaigaluega e galulue i lea po ma lea po.
O se auauna sa tautua ma le filigā i ona foi taimi. E manatua o ia auā o lena vaitaimi sa na o le tasi lava le leitio na iai e na o le 531PI, ma o le leitio lava lea sa tele ina fiafia tagata Samoa e faalogologo ma fesootai ai.
O le tele lava o taimi a iai ni mataupu maaleale e talanoaina i na foi vaitau, e tele lava ina faalalolalo mai le afioga Muliagatele i le atunuu e tusa ai ma so latou foi tautua mai. O se tagata e lē manao i se mea e faaletonu.
E lē manao e faitio atu le atunuu, ma o le ala lava lea na naunau ai ina ia sologa lelei polokalame uma i luga o le leitio.
E manatua pea uluai taimi o le auaunaga a le 531PI a o iai le afioga Muliagatele Sally, o le afioga Nanai, le tofa Iumai Lavea, le susuga Sau Apaau, le susuga ia Lui Ponifasio lea ua avea nei ma faafeagaiga e pei ona iloa tele ai i aso nei.
O le tofa Muagututia Pule ma le tofa Faiumu Pio Faletuai, ma le tofa Fuatamalesa Seepili, lea ua suafa nei ia Tago ma o loo tumau pea o ia i le tautua ai i le atunuu i le auaunaga a le leitio 531PI.
O le afioga foi ia Muliagatele Sala o ia lava lea sa taulamua i le faamaopoopoina o le Miss Samoa New Zealand i le tele o tausaga. O se faalapotopotoga sa sasaa atoa i ai lona fatu ma lona loto ina ia tino mai. E ui ina tele fita ma faigata aemaise ai foi o luitau sa feagai ma le Miss Samoa New Zealand, peitai sa lē faavaivai ai le afioga Muliagatele i lona finau pea i vaega lelei auā le atinae ma le lumanai o le Miss Samoa New Zealand.
E tele ni tamaitai lalelei sa tulai mai e avea ma Miss Samoa New Zealand o i le tele o tausaga ua mavae o le a o latou matuā misia lenei auauna. Poo fea lava e fai ai tauvaga e naunau lava le afioga Muliagatele ina ia manumalo le tausala mai Niu Sila.
E oo mai nei lava ina ua faataotolia o ia i gasegase o le tino o galue pea lava i lenei faalapotopotoga seia oo lava ina ua lē mafai ona ia faaauauina ona tiute, ona faato‘ā malolo lea ae see ane le susuga ia Teeva Matafai e tauave ma faaauau ana matafaioi sa faapea ona galue mai ai i le tele o tausaga.
O vaega ia e faagalogata ai lenei foi auauna. O se tagata sailimalo, tausinio ma le lē fefe foi i se tasi. O le afioga Muliagatele a ia silafia lava le mea o loo faaletonu e lē taitai nofonofo ae faailoa mai lava lona ia foi malamalamaaga i mea o loo ia iloa e sa‘o ma lelei ai ni faamoemoega.
E le taumate o le a toatele i latou o le a misia lenei tamalii ma le tele o taleni sa ia faasoa mai i lona foi soifua galue.
E ola pea ana galuega i le mamalu o le atunuu, aemaise o lana tautua i le leitio ma le Miss Samoa NZ. E tusa ai ma nisi o lipoti o loo faasalalauina i luga o nisi o upega tafailagi, e faapea o le a faia se sauniga faapitoa a le afioga ia Muliagatele Sala Sally Newsham i le falesa poo le nofoaga o loo i le fanua maliu i Papatoetoe, ona faasauni ai lea mo le momoliina atu o lona tino maliu e lagomau i le atunuu pele i Samoa.
Tau ia ina ia faamaise atu le Agaga faamafanafana o le Atua i aiga ma uo, o ē sa pele ma mamae le mafutaga ma le afioga Muliagatele, ona o lana malaga ma le valaau paia a le Atua i lona soifua.
