Ua faaseā le Pule o le upega Tafailagi o le Talamua le Afioga Faumuina Apulu Lance Polu i le pulega o le faalapotopotoga o le Pacmas o loo taulamua lona faatupega e le Malo o Ausetalia, e mafua i lana talosaga na ave i ai mo se fesoasoani tau tupe mo le faaleleia o le gagana Samoa mo tusitala o lana kamupani, ae na teena e lei talia.
O aafiaga faaletagata poo conflict of interests ua tuuaia e Faumuina o le isi lea mafuaaga o lona talitonuga ua lē talia ai.
O le pulega o le Pacmas o loo nofoia e ni sui o itutino tau faasalalauga eseese i le Pasefika e aofia ai ma le tamaitai pule o le kamupani faasalalau i Samoa, le Samoa Quality Broadcasting Limited, le Afioga Galumalemana Faiesea Lei Sam. I le tusi a Faumuina i le faauluuluga o lea faalapotopotoga a o iai le pulega o le Fascmas i Samoa i le vaiaso na tea nei mo ni fonotaga faapea aoaoga sa auai le silia i le toaselau o tusitala ma isi tagata galulue i soo se itutino tau faasalalauga, na agiga ai le faaseā.
O le tusi faaseā o loo faailoa ai e le pule o le Talamuaonline lona faanoanoa i le faaiuga, pe a vaai atu e pei ua tuuitiitia i se vaai a le Pacmas le au galulue i faasalalauga i Samoa. O lona lē fiafia ona sa lē tatau ona iai ni sui o le pulega e iai ni o latou aafiaga poo conflict of interests i le iloiloina ma le faia o faaiuga.
E manino mai i le finagalo o Faumuina o le tamaitai pule o le Samoa Quality Broadcasting Limited sa lē tatau ona aofia i se faaiuga o lana talosaga ona e manatu Faumuina e faigata tele ona ia talia se iuga faapea e faia e se isi tagata o loo la tauva i faasalalauga.
Sa tali mai le tamaitai pule ina ua tāpā mo sona finagalo ma ia faailoa ai e faapea, e lē o se faaiuga na faia toatasi e ia, ae o se faaiuga atoa a le pulega le management group o le Pacmas lea o loo iai i totonu. O lona iai foi i le pulega sa talosaga i le avanoa ina ua faasalalau ma manaomia se tamaitai.
“O le tulaga lena e pei ona e fesili mai, ma le isi itu e lē aogā le faalālā o lata fu‘a ma faailoa ni ona tomai o iai ae aumai se talosaga e lē ausia manaoga o aiaiga e faavae ai le talia o se talosaga.
E lua talosaga mo ni fesoasoani tupe mai Samoa na talia, o le talosaga a le afioga Galumalemana Steve Percival, ma le talosaga a le One Look, ma o ni pisinisi tumaoti uma i le atunuu.”
E lei mafai ona faailoa e Galumalemana Faiesea pe o ā tonu vaega o le auaunaga tau faasalalau ma tusitala na talosaga ai ia pisinisi e lua. Ua teena e le tamaitai pule le iai o sona aafiaga i le faaiuga ua lē talia ai le talosaga a le Talamua Media.
