Ese le matagofie o le faafalelua o nisi o Aoga i Waitakere ina ua molimauina le faatinoga e mātua aemaise i latou sa auai i tauloto, solo, ma tautalaga a le fanau aoga mai lava i le vasega 0 e oo atu i le Vasega 6. Sa vaaia le lagolago o mātua e tusa o lea faamoemoe.
Na amataina lea afiafi o le Gagana i le sauniga lotu puupuu na saunia e Pastor Isaia Lameta ona alo loa lea o vasega o faiaoga e faagasolo le fanau aoga ia latou solo, tauloto ma tautalaga, ma e silia ma le tolusefulu le fanau aoga na tutulai i lea po. Sa lē gata i tautalaga ae sa molimauina foi o latou laei matagogie i lea afiafi.
E toalua nisi sa valaauina faapitoa e faamasinoina lea po matagofie, sa vaaia foi le sagisagi fiafia o le tamaitai Pule Palagi i lea po. Na taufai pati le toatele mai lava i le amataga seia oo mai lava i lona faaiuina, ina ua mae‘a tautalaga ona alo foi lea i faafiafiaga masani mai lava i le fanau aoga. Ina ua mae‘a tulaga uma sa faataunuuina lelei i lea po, ona fai lea o tufatufaga faailoga.
Na tofu faailoga uma fanau sa auai i lea afiafi, ma ua toe sauni atu foi e faaauau pea lenei sootaga i le tausaga fou ma faaauauina ai pea lenei tapenaga. E faafetaia ai galuega a faiaoga i lo latou sogasoga pea, e saili manuia mo le fanau i le lumanai. Tau ina ia faaauauina pea lenei sootaga i le va o Henderson South School ma Lincoln Heights.
