O le tina o le ata lea o le ola i totonu o se aiga. E faatusaina e le tele o tagata o le fatu e ogatotonu i ai faamoemoega ma fuafuaga auā le agai i luma o le manuia o le aiga i soo se matata. O nisi latou te faaigoa le tina o le auli ma le pae auā o i latou e sologa lelei ai le tele o faafitauli e faaono tulai mai ma satia ai le nofo lelei ma le filemu i le va i totonu o fale ma fafo foi.
E taumasuasua upu mananaia e lagi ma faaneenee ai e le toatele le itupa o tina. E oo lava foi i le Tusi Paia o loo sufiina e le Poto le tina ma ave i ai upu faaviivii, fai mai o se ava amio lelei o ai ea se ua ia maua, auā e sili atu lona tau nai lo taimane ma penina o lenei olaga.
E foliga e auga uma faapea le tele o molimau sa fofogaina i le soifua galue o le afioga ia Fepuleai Neva Segia Tatupu. O se tina sa galue o se tasi o poutu i totonu o lona aiga i le tuputupu a‘e a o avea ma tamaitai seia oo mai ai lava i lona soifuaga faateine talavou ma faaiuina ai i le olaga faiaiga ma ta‘ua ai loa o ia o le tina ina ua faaipoipo ma fai foi lana fanau.
O se tina sa lē mapu i le taulogologo ma le fautua i auala uma e manuia ai si ana fanau. E iloa e le toatele le Afioga Fepuleai o se tina lototele, lotoalofa, faamaoni ma fai aiga lelei. E anoanoai upu matagofie sa lagi ai ona molimau, peitai e auga lava mea uma o ia o se tina lelei.
E tala lasi le soifuaga o le afioga ia Fepuleai, peitai e talimalo toe aso o lona soifua pe a manatu i toe itula ae folau loa lona sa i le nuu e galo ai tiga. O le Aso Toonai sa faapea ona alo ai le aiga atoa i le samaina o tatau o nai ona alo, sa faapea ona faaifo le lagimalofie ma taina malu, o lona taumalo sa ia onosaia ai lea vaega tāua o le soifuaga o le Samoa.
Sa fiafia faatasi ma ia ma faailoa mai ona foliga o le loto ua faamalieina i le fanau ona ua mafai ona onosaia le tiga o le au, ma ua ausia foi isi laasaga tāua e saga atili iloa ai le tagata o ia o le Samoa moni.
O ona toe saafiafiga sa faaalia i le Aso Toonai a o alo le aiga i le faamoemoe, ma le lilo i manatu ua i faitotoa le valaau mo ia. O le Aso Sa lava na sosoo ai na faamanavaina ai e le Atua ana feau.
O se mafutaga mafanafana le mafutaga a le afioga Fepuleai ma nai ona aiga, aemaise ai lava o ona alo. O ia o le tuaa tina o le susuga ia Uiese Tatupu, lea e tele ina iloa e tagata i lona suafa Ese, e pei ona faaigoaina ai lana tautua ma lana auaunaga i le atunuu o le Ese Tatupu Funeral Directors.
O se tasi lea o faailoga o ia o se tina maemae ma le sogasogā, auā ua fua mai i galuega a lana fanau lenei moemitiga ma lenei matatia e toatele i latou e lē mafai ona o latou ausia.
O le Aso Toonai o le vaiaso na sei mavae atu nei na faia ai ona toe sauniga ma lagomau ai lona tino maliu i le fanua maliu i Papatoetoe, le Manukau Memorial Gardens.
E avea ai lenei avanoa tāua e momoli atu ai faamaisega ma faamafanafanaga a le Pulega ma le Aufaigaluega a le Samoa Multimedia Group i le susuga Ese ma le Faletua ma le aiga atoa ona o le valaau paia a le Atua i le tina. Ia lototetele ma faatuatua, e ui lava ina tatou iai i lenei lalolagi, ae ua na o se nofoaga lē tumau mo i tatou.
