O tausaga taitasi i le ogatotonu o le masina o Ianuari e agai ai le toatele o vaega faaupufai i le faigalotu faaletausaga a le ekalesia Maori ua ta‘ua o le Ratana. O le ekalesia Ratana e latalata i Wanganui le mea e faamautu ai.
O le masani i tausaga taitasi, o le feiloaiga lea ma vaega faaupufai, ma o ia feiloaiga e maua ai le avanoa e fetufaai ai vaega faaupufai ma taitai o lea ekalesia. O lea feiloaiga o le avanoa lea e faalauaiteleina ai fuafuaga faataoto a le Malo ma vaega faaupufai taitasi mo le silafia a le ekalesia Ratana. O le taimi foi lea e tautino mai ai e taitai o le ekalesia Ratana poo iai ni mea e lagolago i ai latou, a o ā foi ni itu e lē o fiafia i ai.
O le masina o Fepuari i le aso 6 o tausaga taitasi e faamanatu ai le Feagaiga i Waitagi. O se tasi foi lea o avanoa tāua e agai uma i ai vaega faaupufai taitasi ma saili avanoa e feiloai ai ma taitai o Maori i le aso faamanatu e faatāua ai le sainiga muamua o le feagaiga lea ua ta‘ua o le Feagaiga o Waitangi i le va o Papalagi ma Maori.
O lea foi aso tāua e maua ai le avanoa a vaega faaupufai taitasi ma le Malo e fofola i luma o Maori galuega faatino ma galuega faataoto o loo agai i ai galuega faapolokiki a vaega faaupufai taitasi. E maua foi le avanoa a Maori e faaalia ai o latou foi finagalo i ia galuega.
O le vaiaso lea na matou malaga ai i Waitagi na muamua lava le Malo, ma e foliga na faaali sa‘o lava finagalo lē fiafia o Maori i le Malo a John Key ma le tele o a latou faiga faavae.
Ina ua maua le matou avanoa, sa faapea ona aumai fautuaga mo le matou vaega, atoa ma latou faamanuiaga, e ui e iai nisi o Maori e eseese vaega faaupufai latou te lagolagoina.
O loo iai foi se faalapotopotoga mo tagata matutua e ta‘ua o le Grey Power e fai latou fonotaga faaletausaga i tausaga taitasi. E tasi lenei fonotaga faaletausaga e tāua tele mo le au polokiki ma agai uma i ai le toatele vaega faaupufai taitasi.
E pei foi o feiloaiga i Ratana ma Waitangi, o nei avanoa e faaali ai e vaega faaupufai taitasi ma le Malo latou galuega faatino ma fuafuaga mamao mo le lumanai. E uma foi ona tali mai lea o taitai o le Grey Power poo fiafia i ai, pe leai.
Ua ou ta‘ua nei avanoa i Ratana, Waitangi ma le Grey Power ona e fua lou loto ona e lē o maua ni avanoa lelei e vaega faaupufai ma latou taitai e feiloai ai ma nisi o faalapotopotoga tetele a le Pasefika.
E moni lava o nisi o taimi e feiloai ai taitai o le Leipa ma le ekalesia Katoliko i Malaeola i Magele, poo avanoa foi sa lauga ai taitai o vaega a le National ma le Labour ma le autalavou o le Ekalesia o Iesu Keriso o le Au Paia o Aso e Gata ai, ae e lē o iai ni mafutaga maumaututu e pei ona maua e Ratana, Waitagi ma le Grey Power.
A o faagasolo galuega faapolokiki ma agai i luma e iai lava lo‘u manatu e tatau ona maua avanoa a vaega faaupufai taitasi e feiloai atu ai ma le tele o faapotopotoga, poo ekalesia a le tatou Atunuu. O ia avanoa e mafai ai ona tapue mai fuafuaga a vaega faaupufai mo le lumanai, auā o latou fuafuaga nei e faatino pe a tulai mai e avea latou ma faigamalo.
O le avanoa foi lea e mafai ai e tatou faalapotopotoga ona luitau vaega faaupufai ina ia o tutusa a latou fuafuaga ma mea o loo lagolago e tatou tagata. O avanoa foi nei e mafai ai ona tuualalo atu finagalo a le tatou Atunuu i le faigamalo poo ai lava le faigamalo, i mataupu e tatau ona ave i ai le faamuamua a le Malo.
O i foi i nei avanoa e mafai ai ona fautuaina vaega faaupufai i mataupu ma galuega e ao ona latou faatino mo le manuia o le tatou Atunuu ma tatou aiga.
Afai foi ua faigata i faapotopotoga taitasi ona faataunuu ni avanoa e feiloai ai, mata e faigofie ona tuufaatasi nisi faapotopotoga, poo nisi foi mafutaga mo le faatinoina o ia feiloaiga ma vaega faaupufai taitasi?
Ou te maitau i Ueligitone o loo maopoopo le faapotopotoga soofaatasi a Ekalesia Samoa. O loo maua o latou avanoa e fesootai ai ma nisi o Minisita a le Malo e faatatau i mea o loo mananao i ai ekalesia. Peitai ane, ou te talitonu lava a‘u ia, e tatau ona faamasani vaega faaupufai taitasi ma le Malo ina ia feiloai i se tulaga aloaia ma fetufaai e pei ona faia e Ratana, Waitangi ma le au Grey Power.
Faapefea Aukilani? E mafai ea ona fausia se faapotopotoga tuufaatasi a ekalesia Samoa mo le galulue faatasi? E mafai ea ona faamasani ia feiloai ma vaega faaupufai i tausaga taitasi? E mafai ona tatou faia se fuafauga e faamasani ai vaega faaupufai taitasi ina ia lipoti atu i nei ekalesia, poo faapotopotoga, i tausaga taitasi i galuega faatino, ma fuafuaga faataatia mo le lumanai? E pei ona faia e Ratana, Waitagi ma le Grey Power?
Ou te talitonu e tāua le maua o nei avanoa, ina ia faafofoga i ai le tatou Atunuu i le Malo ma vaega faaupufai taitasi – i galuega faatino ma fuafuaga faataatia mo le tausaga – ma e maua ai foi avanoa tatou te fautuaina ai le Malo ma vaega faaupufai taitasi i le sese, poo le sa‘o, poo le faaletonu o a latou galuega ma fuafuaga faataatia.
Afai e mafai e Samoa ona taulamua i lea mea, o le a faapena ona mulimulitai mai isi tagata atumotu o le Pasefika. Afai foi e mafai ona tatou faamasani le Malo ma vaega faaupufai taitasi ona feiloai ma tatou i tausaga taitasi, o le a faapena foi ona maua tatou avanoa e tele ai so tatou sa‘o tuuloloto i faiga faavae a le Malo ma vaega faaupufai taitasi mo le manuia o tatou aiga ma Niu Sila atoa.
Aisea? Auā foi o lea ua avea Niu Sila ma tatou atunuu moni. O lea ua pine i le avea o le toatele o tatou ma tagatānuu moni o Niu Sila.
