O le pitonuu o Sunshine i le aai o Melepone, na faataunuu ai i le Aso Gafua na se‘i mavae atu nei, aso 4 o Fepuari, se uluai talanoaga, i le va o le matagaluega o leoleo ma le mamalu o le aufaigaluega paia a le Atua mai Tovine eseese, faatasi ai ma i latou o galulue mo tupulaga talavou (youth workers).
O le auga o lenei talanoaga, ina ia soalaupule le manao e pei ona folasia e malu o le malo, e uiga i tupulaga mai atumotu o le Pasefika, lea o loo agai pea i luma le fai kegi ma faatuputupu vevesi i nofoaga faatali train (train stations).
O se finagalo o leoleo, e maualuga le pasene o tupulaga Samoa o loo aafia ai i nei faiga ma uiga vaogata.
O nisi o foliga ma igoa ua matuā masani ai leoleo, ona ua molia soo i lenei lava tulaga, mai le nofoaga lenei i Sunshine. Ua loa tausaga o galulue faatasi matagaluega eseese a le malo e tau fofo ma foia le faafitauli, peitai, e aliali mai e lelei na o sina taimi, ona toe amata lea ona oso faama’i malosi.
O nisi o polokalame faatino sa taumafai i ai, o le tuufaatasia lea o se kalapu lakapi ae faatupeina e le city council e pei ona sa lipotia foi e la tatou pepa i se taimi o le tausaga talu ai. Peitai ua faaalia e leoleo e na o se vaega itiiti o le tupulaga e fiafia ma tumau ai i taaloga, ae e tele lava ina toe foi ma faatasitasi i train station.
Talu ai la ona ua amata malamalama le ofisa o leoleo, o tamaiti ma tupulaga Pasefika aemaise lava Samoa e faaaloalo tele ma usitai i o latou faifeau, o le ala lea na talosagaina ai le faamoemoe lenei, se‘i momoli mai lo latou manao mo se fesoasoani mai le aufaigaluega, atonu e faamāmā avega ai i la latou galuega, aemaise foi o aiga ma mātua o tupulaga nei, ua amata mai lava i le 13 tausaga le laity.
O se tasi o vaega o la latou talosaga, pe finagalo malie faafeagaiga, ae o latou galulue faatasi i po o Aso Lulu taitasi, lea e alu ai la latou pasi, ma se vaega o leoleo, youth workers, ma isi tagata galulue faapitoa mo tupulaga (specialists) i le train station, e le gata e iloatino ai e tupulaga nei ua savali atu faifeau ia i latou, ae ia fau ai foi se sootaga o le aufaigaluega ma mamoe faalogogata nei ma faatuputupu vevesi.
E aliali mai ua fiu ma iso leoleo, ua tagisia ai le pitolaau faaleatua a le aufaigaluega. Ona autasi lea o finagalo o Faafeagaiga, o le a toe tāloa se isi talanoaga i le Aso Lua aso 26 o le masina lava lenei, ma valaaulia uma ai le loaloa o le aufaigaluega paia i le malumalu o le susuga i le toeaina ia Onesemo Pulepule o le AOG i Sunshine i le itula e 6 i le afiafi.
E valaau atu ai ma le faaaloalo tele i le susū i susuga i faafeagaiga taulagi o Ekalesia eseese i lea vaega o Melepone, ina ia talaaao ane, o se tofa poto ma se utaga loloto mai le Lagi, e tuufaatasi ai se vaifofo mo tupulaga lalovaoa o Samoa, o le lumanai lea o aiga, nuu, afioaga ma ekalesia.
