O le tuanai o le afā o Eveni na aafia ai Samoa i le masina o Tesema na amata fuafua ai e le Faaili iloga i Sini, le Legends, so latou sao e fesoasoani ai. Na saunoa le alii taitai faaili Tumatavai Sese Piilua, “O pitonuu na afaina tele i lologa mai Magiagi, Lelata, Maagao Leone, Faatoia ma Matautu o loo aumau ai nisi o aiga o sui o le faaili lenei.”
Na amata tuufaatasia ma le susuga i le alii pese ia Lonetona Siitia le alo o Molioo Sumeo Siitia se aso mo le aiga (family day) lea ua sauni atu ai mo le Aso Faraile nei sefululima o Fepuari mai le itula e lima i le afiafi agai atu i le sefulutasi i le po.
O le nofoaga tele i le Civic Centre i Blacktown le Bowman Hall o le a faatasi ai le mamalu o le atunuu i se faamoemoe o faafiafiaga, musika, fale‘aiga ma ata tifaga o le lologa na aafia ai si o tatou atunuu. O le a faaali ai foi se ata puupuu o le Tofa Molioo Sumeo Siitia a o faailoa lona vii e usuina e lona alo ia Lonetona faapea le Legends band.
O le auga lava o lea aso ina ia iai se nofoaga e potopoto faatasi ai le atunuu ma manatua le sauaga a tafega ma lologa i pitonuu na aafia tele. Na molimoli foi le valaau aloaia a le Legends i soo se faaili, teine, tama pese ma ausiva e fia faailoa a latou taleni i le Aso Faraile.
Ua talia le valaaulia e nisi o Ausiva a Ekalesia faapea isi mafutaga vaganā ai faaili. O le ofo fua o le tautua a le Legends lea e masani ona faafiafia i le $1,200 Ausetalaia mo sailiga seleni ma tausala a Ekalesia ma Afioaga ua mafua ai le tulai mai o lea faamoemoe muamua.
O le Aso Faraile foi o le a tauaao ai e nisi o Kamupani ma fale faigaluega o loo galulue ai sui o le Faaili ni a latou meaalofa tau seleni, taumafa, ofu ma faleie auā i latou ua pagatia i Samoa.
Saunoa Tumatavai Sese Piilua ma Lonetona Siitia, o se taimi muamua lenei ua taumafai ai i se tulaga faapea e ofo fua ai le latou tautua aemaise sa latou lava meaalofa mo nai o tatou tagata. O loo sauni foi le Faaili e faamaumau lelei ma manino foai nei ma momoli sa‘o atu lava i afioaga o loo moomia.
E fuafua o le itula e lima i le afiafi e fiafia faatasi ai fanau ma nai mātua ma faasolosolo atu ai lava le polokalame i faafiafiaga ma Siva se‘i tapunia i le itula e sefulutasi. O le po lava o le Aso Faraile nei o le a faafofoga ai foi le mamalu o Samoa i Sini nei a o faafiafia le Legends ma la latou CD fou o loo taina i leitio Samoa i Niu Sila, Samoa ma Ausetalia nei le Vol.1 lea e iai le Vii o le Vai (Mata o le Alelo) Vii o Sumeo, Vii o Pritchard ma isi fatuga mālie. O loo fesoasoani le Asosi Tusitala a Samoa i Sini i lenei faamoemoe.
O le ulufale na o le $1 poo le Gold Coin Donation. O nisi o tautua iloga a le Legends Band i Sini nei e aofia ai le faafiafiaga i Sini nei ma Mailo Ben Vai, Ben Petana, Molioo Sumeo Siitia, Tala Pauga ma le Tauga Apu a Joe Failua.
O le Aso Faraile nei i le 5pm-11pm o le a ofo ai le tautua a nei alo talenia mo se fesoasoani auā aiga ma nuu.
O nisi faamatalalaga o loo maua pe a valaau Tumatavai Sese Piilua i le telefoni 0405528101.
