E tusa ai ma sailigatupe na alo atu i ai le mamalu o le atunuu o loo alaala ma afifio i totonu o aai e fia o Niu Sila auā se fesoasoani mo le aulakapi a le atunuu, le Manu Samoa a o iai i taamilosaga o le Ipu o le Lalolagi lea o loo tapuaia o latou faiva e soo se Samoa i totonu o Niu Sila nei.
Manatua foi o lenei sailigatupe o loo faatautaia e le komiti faafoe i totonu o Aukilani (Manu Samoa Supporters Club), afioga Toalepai Tautolo (Presitene), Aiolupo Roache (Sui-Presitene) ma le latou ofisa, ae o loo iai ma sui komiti o aai mai Otago, Kalaiesetete ma Ueligitone lea sa latou tuutaliga e ala i fonotaga ma fesootai e ala i imeli a aulia le aso 17 Setema o le a momoli aloaia mai ai le foai a lea pitonuu ma tuuina aloaia atu i luma o le afioga i le Palemia, o ia foi o le faauluuluga Iuni Lakapi o le Manu Samoa.
Peitai la ina ua faataunuuina le aso sa tuupoina i le afiafi o le Aso Toonai, 17 Setema i le Otahuhu Rugby Rooms, na faatasi atu i ai le faigamalaga a le afioga i le Palemia, Tuilaepa Sailele Malielegaoi, o alii Minisita e toatolu o le malo, faapea le Konesula Faolotoi Reupena Pogi & Komesina Asi Blakelock aemaise le aofia na iai auā e lē toatele se fuainumera na auai atu, faapea tusitala i nusipepa ma leitio Samoa.
O le susuga i le faafeagaiga Rev Ata Milo (EFKS Otahuhu) sa saunia se lotu faafetai puupuu ona faaauau ai lea o polokalame faagasolo, ona o loo faatopetope polokalame a le Palemia e fia mafuta atu i le Manu Samoa i Hemilitone i lea lava afiafi.
Na saunoa faafeiloai le afioga Faolotoi Pogi, ona tulei saunoa lea o Tuilaepa ma faalaeiau i le atunuu aemaise ana tala mālie e tau faatea ai le nofo popole.
O sui mai Otago na auai o Satele Faatoese, Lagi Latu, Falepauga Alai ae o Tofilau Nina Alai sa saunoa mo le latou foai $7000, o le afioga Toalepai Tautolo na saunoa e momoli le foai $100,000 a Aukilani, e aofia ai le leitiofoni ua tuufaatasi ma le tupe maua o le posiva ma le feiloaiga lea sa faia i le Telstra ina ua taunuu le Manu Samoa i Aukilani.
O loo aofia ai ma le siva a Kalaiesetete $400.00 i le aofaiga pei ona taua i le saunoaga a To’alepai.
Na toe saunoa Tuilaepa e faafetaia le aaofoai o Samoa atoa e tusa ma le agalelei i tamafanau o le atunuu, aemaise foi o se faatalauula mai mo se fesoasoani, na auai le afioga i le Komesina mai le laumua ae e lei faailoa ane pe iai se latou fesoasoani.
O fea le vaitele o iai le $18,000 a Kalaiesetete?
Na fesiligia e le tusitala, o le sui foi o le komiti leitiofoni a Kalaiesetete pe aisea ua lē faalauiloa mai ai le foai a lenei aai maluelue, ma na faamanino e Toalepai Tautolo ua tuu sa’o lava e Kalaiesetete le latou foai i le aumalaga i le aso na faia ai le feiloaiga i Telstra, ae o lea sa mae’a faaiugafono i le komiti se’i momoli faatasi foai uma a pitonuu o Niu Sila i le aso tuupoina.
Na silafia foi e Tagaloa Su’a ma le susuga i le faifeau Fitifiti Luatua lea tulaga ae e pule lava Sitafune ia i le la o lona vaa.
Na maua se avanoa faatauvaa e fai sina tala puupuu e talamasine ai le aaofoai o le aai malamalama o Kalaiesetete e mauaa i le faatuatua lea o loo tapuai filemu e ui ina lē oo atu se taaloga.
O le tupe o mitiafu ma pulou e iai se taimi faamalamalama e pei ona saunoa le komiti ae o loo faamaopoopo pea, ae mo le aai o Kalaiesetete, tulimatai le avanoa lea mo le lisi o le leitiofoni i le lomiga vaiaso fou.
