Ua toe tatalaina nei le nofoaga e tausia ai gasegase ma tagata matutua i Magele, ina ua mae’a ai le tele ma le anoanoai o faafitauli sa fetaiai ma pulega sa faatautaia lea nofoaga mo le taimi muamua.
E ui ina sa tele faafitauli sa fetaiai ma le nofoaga lenei i Magele i ni fatia ua tuanai, peitai ua masuiga mālie ma ua toe faafouina nei ma tulai mai, e toe faaauauina le tautua ma le auaunaga e pei ona faavae mai ai i lona uluai taimi.
O se nofoaga ua mae’a ona toe faafouina ma sa molimauina ina ua asia e le Samoa Times, totonu ma fafo atoa ai ma lona faatotogaina. E tolu miliona tala le tau aofai o le galuega toe faafou sa toe fausia ma faaleleia ai lea nofoaga.
O lea faamatalaga sa saunoa i ai le Faatonusili o le pulega a le faalapotopotoga a le Bupa, Dwayne Crombie, o latou lea na manumalo i le avanoa e toe faagaioi ai le Culverden e pei ona sa amata mai ai.
O fesootaiga vavalalata a le Bupa ma le Pulega faaitumalo a le Soifua Maloloina i Manukau, le Manukau District Health Board, sa mafua ai ona toe tatalaina lea nofoaga, ina ua faamalieina aiaiga ma tuutuuga sa manomia, mo le saogalemu ma le mamā o le siosiomaga.
Ua faaigoaina le nofoaga ia David Lange Home Care, o se tasi o tamā iloga ma e ta’uta’ua tele i le aai o Magele i tausaga ua tuanai.
O David Lange na maliu i le lua tausaga ua mavae, a o ia tauaveina pea se tasi o suafa tāua o Tagaloa sa faasuafaina ai e le afioaga o Samatau i Samoa. O le maota lava o le Maopu o le Tuiaana ia Aii Fagafeuo, sa faaee ai le suafa Tagaloa, ona o fesootaiga faaleuo a Aumua Ioane Wendt ma David Lange a o galue ai i Samoa i le vaitaimi o le 1970.
O le faaigoaina o le falemai ia David Lange, ona o le faatauanau a tagata lautele o le aai o Magele, i le agaga e faamanatu ai le tautua a lea foi tamā, a o se tagatānuu lava o Magele, ma na maliu ai lava foi a o alaala i totonu o Magele.
O le Bupa Care Service, e 45 a latou nofoaga o falemai ma nofoaga mo tagata matutua, isi totonu o le atunuu atoa, ma e silia i le 17,000 gasegase ma tagata matutua o loo vaaia ma faaaogāina le tautua a lenei kamupani tele i Niu Sila.
O nofoaga e pei o le Parkhaven i Magele, Haymen Rest Home i Manukau, ma le Erin Park i Manurewa, o nisi ia o nofoaga ma falemai taulalata ane i Magele, o loo i lalo o le faalapotopotoga a le Bupa Group. O le 1991, na faavae ai le Bupa, ma amata ai lana tautua mo le vaaia o gasegase ma tagata matutua i le tulaga o le soifua maloloina.
Sa faamaonia foi e le alii Faatonusili, Dwayne Crombie, i lana saunoaga i le tatalaina o le David Lange Home Care, e leai nisi o teutupe, pe fai sea i le faalapotopotoga a le Bupa.
O se tulaga lelei lea ina ia mautinoa ai, o tupe ma polofiti e maua, o le a toe agai sa’o lava e faaleleia ai, ma tausia lelei ai gasegase a ana paaga o loo faaaogāina le auaunaga.
