O le faatāuaina o faiga sauā ma le faaoolima, atoa ai ma le aumaia o le saolotoga i totonu o aiga, sa faaautu i ai se savali tele a tagatānuu eseese i le pitonuu o Porirua i le Aso Sa na tea nei, aso 18 o Setema 2011.
O le solo tele sa tapenaina mo le lagolagoina o aulakapi mo le Ipu o le Lalolagi, peitai sa afifi atu ai ma se feau tāua e pei ona faamatalaina. O le savali sa faaigoaina faapea, Strong Pacific Families Rugby World Cup.
E silia ma le 2000 i latou sa auai ane ma faataunuuina lea savali tele, sa taulai i fiafiaga mo le Ipu o le Lalolagi. Sa lipotia i se pepa o faamatalaga sa faamatuu mai e faapea, o se avanoa sa vaaia ai le tutu faatasi, talanoa faatasi ma talatalanoa faatasi o aiga ma tagata lautele mai le tele o atunuu, i le taimi o lea savali.
O alo ma fanau mai aoga laiti e 20 sa auai ma faatinoina lea faamoemoe. O aoga foi ia o le a tauva i se taamilosaga lakapi o le a faia i le vaiaso fou, ua faaigoaina o le Porirua Rugby Nations Tournament.
O aoga taitasi i lea veaga o le atunuu, sa iai lava a latou ‘au uma ua mae’a ona sauni e faalauiloa i le taimi o lea taamilosaga e pei ona fuafuaina.
Sa faalogoina tamaitai aoga mai le aoga i Titahi Bay North School, sa alalaga ma valaau mo le aulakapi a Farani, a o le aoga a Ngati Toa Primary sa alalaga ma faalauiloa le All Blacks. Sa faailoa foi le fiafia o nisi o tama aoga o aoga sa auai, ona o le matagofie ma le tulaga sa oo i ai le aso faapitoa sa faatinoina.
O le alii o Bronte Metekingi, sa ia molimauina o se tasi o vaaiga, ma se gaioiga o loo ia tulimatai ma fiafia i ai, o le taimi o le a latou faatino ai le Haka a le All Blacks. Sa faamaonia mai e se tasi o sui sa tuufaatasia lea savali tele, sa ia ta’ua ai o le 2000 o tagata sa auai, sa aofia ai ma tagata mai le Cook Island, ma sa matuā leoleoā ma leotetele ai a latou pate ma isi.
Sa molimauina foi le auai ane ai o le faailipu a se tasi o ekalesia a tagata Tonga, ma sa tele foi so latou sao mo le faamatagofieina o le aso ma le faamoemoe.
Peitai o le autū ma le sini sa faamamafaina ma taulai i ai, o le faatāuaina o aiga ma le saogalemu mai sauāga ma faiga lē manuia, a o tumutumu ai le toatele mai isi atunuu i totonu o Niu Sila.
